Nanded Election : निष्ठावंताना डावलून भाजपची मटका चालकाच्या पत्नीला उमेदवारी; माजी नगरसेवकाचा आरोप

Nanded Election BJP : मटका चालकाला, सट्टेबाजाला उमेदवारी देऊ नका अशी पक्षाकडे वारंवार मागणी केली असल्याचा दावा माजी नगरसेवक व्यंकटेश जिंदम यांनी केला. 

Nanded Election BJP

Source : abp majha

नांदेड : महापालिका निवडणुकीच्या तोंडावर आयाराम-गयारामांची संख्या वाढली असून बाहेरून आलेल्या लोकांना तिकिट दिलं जात असल्याचा आरोप सर्वच पक्षातून होत आहे. नांदेडमध्येही तशीच काहीशी स्थिती आहे. प्रभाग क्रमांक 9 मधून निष्ठावंतांना डावलून मटका चालकाच्या पत्नीला तिकीट दिल्याचा आरोप भाजपचे माजी नगरसेवक व्यंकटेश जिंदम यांनी केला. पैशाच्या जिवावर ही उमेदवारी दिली असल्याचा आरोपही त्यांनी केला. 

भारतीय जनता पार्टीने शेवटच्या दिवशी एबी फॉर्म देत आपले उमेदवार घोषित केले. त्यात प्रभाग 9 मध्ये भाजपने मटका चालकाच्या पत्नीला उमेदवारी बहाल  केल्याचा आरोप करण्यात येत आहे. त्यामुळे या प्रभातील निष्ठावंत उमेदवारांनी नाराजी व्यक्त केली.

Nanded BJP : मटका चालकाचे पक्षात योगदान काय? जिंदम यांचा प्रश्न

या भागातून भाजपने मटका चालक, क्रिकेट सट्टेबाजी करणाऱ्याच्या पत्नीला उमेदवारी दिली. त्यांचे पक्षात योगदान काय आहे? दोन महिन्यांपूर्वी ते पक्षात आले आणि त्यांना थेट उमेदवारी देण्यात आल्याचा आरोप माजी नगरसेवक व्यंकटेश जिंदम यांनी केला. 

व्यंकटेश जिंदम म्हणाले की, "आपली उमेदवारी कापण्यात अशोक चव्हाण यांचे विश्वासू किशोर स्वामी यांचा हात आहे, त्यांनी एक सोडून दोन तिकिटं पदरात पाडून घेतली. आमचा प्रभाग असूनसुद्धा आमच्या नावाचा साधा विचार केला नाही. पैशाच्या जोरावर उमेदवारी दिली."

Maharashtra Election : राष्ट्रवादीतून भाजपात, एकाच दिवसांत नगरसेवक

धुळे महानगरपालिका निवडणुकीच्या अर्ज छाननी दरम्यान राष्ट्रवादी काँग्रेस शरद पवार पक्षाचे शहर जिल्हाध्यक्ष असलेले रणजीत राजे भोसले यांनी तडकाफडकी पक्षाचा राजीनामा देत शेवटच्या क्षणी भाजपात प्रवेश केला होता आणि त्यांच्या धर्मपत्नी उज्वला भोसले यांना भाजपाचे तिकीट मिळवले होते. मात्र, आज अर्ज छाननी दरम्यान त्यांच्या विरोधात असलेल्या चारही उमेदवारांचे नामांकन अर्ज बाद झाल्याने त्या बिनविरोध निवडून आले आहेत. त्यामुळे, धुळे मनपातील 'त्या' पहिल्याच नगरसेविका म्हणून बिनविरोध निवडून आल्या आहे. विशेष म्हणजे एकाच दिवसात भाजप प्रवेश केला अन् दुसऱ्याच दिवशी नगरसेवक बनल्याचा वेगळाच रेकॉर्ड त्यांच्या नावावर तयार झाला आहे. 

कल्याण डोंबिवलीतील प्रभाग 18 'अ' मधून रेखा राजन चौधरी यांनी उमेदवारी अर्ज दाखल केला. मात्र, अर्ज दाखल करण्याच्या अखेरच्या क्षणापर्यंत एकाही विरोधकाकडून त्यांच्याविरोधात उमेदवारी अर्ज दाखल करण्यात आला नसल्याने रेखा चौधरींचा विजय निश्चित झाला. तर पहिल्यांदाच निवडणुकीच्या रिंगणात उतरलेल्या आसावरी नवरे यांनीही विजय मिळवला आहे. आसावरी केदार नवरे यांनी प्रभाग क्रमांक 26 (क) मधून खुल्या प्रवर्गातून उमेदवारी अर्ज दाखल केला होता. त्यांच्या विरोधात एकही अर्ज न आल्याने त्यांची निवड बिनविरोध झाली आहे.

ही बातमी वाचा: