Shravan 2025 : 24 की 25 जुलै? यंदा श्रावण महिना कधीपासून? पहिला श्रावणी सोमवार कधी? जाणून घ्या श्रावणाचं महत्त्व

Shravan 2025 : भगवान शंकराला श्रावण महिना फार प्रिय आहे. त्यामुळेच या महिन्याचं महत्त्व फार आहे. अत्यंत पवित्र असा हा महिना मानला जातो. 

Shravan 2025

Source : Abp Web Team

Shravan 2025 : हिंदू पंचांगानुसार, श्रावण (Shravan) महिन्याला फार धार्मिक महत्त्व आहे. त्यानुसार, जुलै महिन्याच्या शेवटी म्हणजेच येत्या 25 जुलैपासून श्रावणाला सुरुवात होतेय. श्रावणात नागपंचमी, नारळी पौर्णिमा, रक्षाबंध असे अनेक सण मोठ्या आनंदात आणि उत्साहात साजरे केले जातात. त्याचप्रमाणे, श्रावणात प्रत्येक सोमवारला विशेष महत्त्व आहे. दरम्यान, उत्तर भारतीयांच्या श्रावण महिन्याला सुरुवात झाली आहे. तर, महाराष्ट्रात श्रावण नेमका कधी? याची सर्वांनाच उत्सुकता आहे. 

भगवान शंकराला श्रावण महिना फार प्रिय आहे. त्यामुळेच या महिन्याचं महत्त्व फार आहे. अत्यंत पवित्र असा हा महिना मानला जातो.  श्रावणात अनेक देवी-दैवतांची पूजा केली जाते. हा महिना भगवान शंकराला समर्पित असल्या कारणाने अनेक व्रत-वैकल्ये, उपवास केले जातात. असं म्हणतात की, भगवान शंकराची मनोभावे पूजा केल्यास आपल्यावर शंकराची विशेष कृपा राहते. 

महाराष्ट्रात श्रावण कधीपासून?

2025 या वर्षाचा श्रावण महिना येत्या 25 जुलैपासून सुरु होणार आहे. 25 जुलै श्रावण शुक्ल प्रदिपदेपासून श्रावण महिन्याला सुरुवात होणार आहे. तर, 23 ऑगस्ट 2025 ला श्रावण अमावस्येला या तिथीची समाप्ती होणार आहे. श्रावण महिन्यात श्रावणी सोमवाराला विशेष महत्त्व आहे. त्यानुसार यंदाच्या श्रावणात 4 श्रावणी सोमवार येणार आहेत. 

श्रावण महिन्याचं महत्त्व 

हिंदू धर्मात श्रावण महिन्याला विशेष महत्त्व आहे. श्रावण महिन्यात मंगळागौर पूजन, नागपंचमी, रक्षाबंधन, पोळा यांसारखे सण-उत्सव साजरे केले जात असल्यामुळे या महिन्याला विशेष महत्त्व आहे. तसेच, या महिन्यात भगवान शंकराच्या उपासनेला महत्त्व आहे. याशिवाय काही सण आहेत जे आपल्या पर्यावरणाचा विचार करुन त्याविषयीची कृतज्ञता व्यक्त करणारेही सण याच महिन्यात असतात त्यामुळे या महिन्याचं महत्त्व आणखी वाढतं. 

यंदाच्या श्रावणात एकूण 5 श्रावणी सोमवार

पहिला श्रावणी सोमवार - 28 जुलै 2025

दुसरा श्रावणी सोमवार - 4 ऑगस्ट 2025

तिसरा श्रावणी सोमवार - 11 ऑगस्ट 2025

चौथा श्रावणी सोमवार - 18 ऑगस्ट 2025

उत्तर भारतात श्रावणाला सुरुवात 

उत्तर भारतात 11 जुलैपासून श्रावण महिन्याला सुरुवात झाली आहे. तर, महाराष्ट्रात श्रावण महिन्यातील शुक्ल पक्षातील प्रतिपदा तिथीपासून श्रावण महिना सुरु होणार आहे. यावेळी 4 श्रावणी सोमवार येणार आहेत. 

(टीप : वरील सर्व बाबी एबीपी माझा केवळ माहिती म्हणून वाचक-प्रेक्षकांपर्यंत पोहोचवत आहे. यातून एबीपी माझा कोणताही दावा करत नाही.)