Maharashtra New CM : दिल्लीत ठरलं!भाजपचाच मुख्यमंत्री; लवकरच औपरचारिक घोषणा

Amit Shah Meeting On Maharashtra CM: राज्याच्या मुख्यमंत्रिपदासंदर्भात काल (28 नोव्हेंबर) रात्री दिल्लीमध्ये अमित शाहांच्या निवासस्थानी बैठक झाली. अमित शाह (Amit Shah), एकनाथ शिंदे (Eknath Shinde), देवेंद्र फडणवीस (Devendra Fadnavis), अजित पवार (Ajit Pawar) यांच्यासह इतर नेत्यांच्या उपस्थितीत ही बैठक संपन्न झाली. बैठकीमध्ये मुख्यमंत्रिपदासह खातेवाटपाबाबत चर्चा झाल्याची माहिती आहे. दरम्यान आज मुंबईत महायुतीची बैठक होणार आहे. शिंदे, फडणवीस, अजित पवार या बैठकीला उपस्थित असतील. अमित शाहांनी दिलेल्या सूचना आणि निर्णयांबद्दल बैठकीत चर्चा होणार आहे.  तर येत्या दोन दिवसांत निरीक्षक महाराष्ट्रात येणार असल्याचीही शक्यता वर्तवण्यात येते आहे. त्यामुळे महाराष्ट्राचा मुख्यमंत्री कोण होणार हे लवकरच स्पष्ट होईल. 

बैठकीत काय काय घडलं?

एकनाथ शिंदे, देवेंद्र फडणवीस, अजित पवार, सुनील तटकरे आणि प्रफुल पटेल काल अमित शाह आणि जेपी नड्डा यांच्यासोबतच्या बैठकीसाठी दिल्लीत दाखल झाले होते. या बैठकीत मुख्यमंत्रिपद आणि मंत्रिमंडळाबाबत चर्चा झाली. रात्री सुमारे दोन तास अमित शाहांच्या निवासस्थानी चर्चा झाली. यानंतर दोन दिवसांत निरीक्षक महाराष्ट्रात येणार असल्याची माहिती समोर आली. तसेच उपमुख्यमंत्रिपदाबाबत कालच्या बैठकीत कोणताही निर्णय नाही झालेला नाही.