Mumbai Monorail: 'अपघात नाही, मॉकड्रिल होतं', MMRDA चा दावा, पण कर्मचारी संघटना अपघाताच्या वृत्तावर ठाम!

मुंबई मोनोरेलच्या (Mumbai Monorail) ट्रायल रनवेळी वडाळा (Wadala) डेपो परिसरात अपघात झाल्याची माहिती समोर आली आहे, मात्र मुंबई महानगर प्रदेश विकास प्राधिकरणाने (MMRDA) हा अपघात नसल्याचं म्हटलं आहे. 'हा कोणताही अपघात नसून आम्ही मॉकड्रिल करत होतो,' असा दावा MMRDA ने केला आहे. याउलट, कर्मचारी संघटनेच्या म्हणण्यानुसार, हा अपघातच होता आणि त्यात काही कर्मचाऱ्यांच्या डोक्याला इजा झाली आहे. या घटनेत मोनोरेलचे चाक निखळल्याचे आणि इंजिनचा फायबर तुटल्याचे दिसून आले. सुरुवातीला, कंपनीच्या अधिकाऱ्यांनी या घटनेवर बोलण्यास नकार दिला. सध्या प्रवाशांसाठी मोनोरेलची सेवा बंद असून, नवीन डब्यांची चाचणी (Trial Run) सुरू असताना हा प्रसंग घडला. MMRDA कडून जरी हा मॉकड्रिल असल्याचं सांगितलं जात असलं, तरी दृष्य आणि कर्मचारी संघटनेच्या दाव्यामुळे अनेक प्रश्न निर्माण झाले आहेत.