Sanjay Gaikwad Case | आमदार संजय गायकवाडांवर गुन्हा दाखल, अखेर तीन दिवसांनी कारवाई

मुंबईतील आमदार निवासातील कँटीनमधील कर्मचाऱ्याला मारहाण केल्याचा आरोप असलेल्या आमदार गायकवाडांवर अखेर गुन्हा दाखल करण्यात आला आहे. या प्रकरणी तीन दिवस उलटूनही कोणतीही कारवाई होत नव्हती. एबीपी माझा या वृत्तवाहिनीने हे प्रकरण लावून धरले आणि सरकारला यावर कठोर प्रश्न विचारले. आमदारांवर वेगवेगळे कायदे लागू होत नाहीत, त्यामुळे त्यांच्यावर गुन्हे दाखल झालेच पाहिजेत, अशी एबीपी माझाची ठाम भूमिका होती. या पाठपुराव्यानंतर तीन दिवसांनी का होईना, पण आज आमदार गायकवाड यांच्यावर भारतीय न्याय संहितेच्या अंतर्गत कलम ३५२ (अपमानित करणे), कलम ११५ उपकलम २ (मारहाण करणे) आणि तिसरे कलम उपकलम ५ (संगनमत करून मारणे) हे अदखलपात्र गुन्हे नोंदवण्यात आले आहेत. या अदखलपात्र गुन्ह्यांची माहिती मरीन ड्राइव्ह पोलिसांकडून विधानसभा अध्यक्षांना पत्राद्वारे कळविली जाणार आहे. या सर्व घडामोडींनंतरही आमदार संजय गायकवाड यांची आमदारकी मात्र कायम आहे. या घटनेमुळे लोकप्रतिनिधींच्या वर्तनावर पुन्हा एकदा प्रश्नचिन्ह निर्माण झाले आहे.