Mahadevi Elephant : महादेवीला वनतारात नेताना नेमकं काय घडलं होतं Special Report

कोल्हापूरच्या नांदणी मठातील महादेवी हत्तीणीला कोर्टाच्या आदेशानुसार गेल्या आठवड्यात गुजरातमधील वनतारा प्राणी संग्रहालयात हलवण्यात आले. यावेळी काही तरुणांनी हुल्लडबाजी करत पोलिसांच्या गाड्यांची तोडफोड केली. याप्रकरणी पोलिसांनी सुमारे १४० जणांवर गुन्हे दाखल केले होते. आज झालेल्या सुनावणीत कोर्टाने या १४० जणांना जामीन मंजूर केला. नियमित जामीन अर्ज आणि अटकपूर्व जामीन अर्जावर कोर्टाने प्रत्येकी १५ हजार रुपयांचा जामीन देण्याचे आदेश दिले. दुसरीकडे, महादेवी हत्तीणीला परत आणण्यासाठी रविवारी हजारो कोल्हापूरकर रस्त्यावर उतरले होते. वनतारा प्रशासनाने महादेवी हत्तीण सुखरूप असून तिच्यावर उपचार सुरू असल्याचे स्पष्ट केले आहे. वनताराने प्रसिद्धीपत्रक जारी करत म्हटले आहे की, "वन्यजीव विभाग आणि जैन मठानं जर न्यायालयाकडून संमती मिळवली तर महादेवी हत्तीणीला परत पाठवलं जाईल." हे प्रकरण आता राजकारणातही चर्चेचा विषय बनले आहे. लोकांच्या भावनांचा शासनाने विचार करावा, अशी मागणी होत आहे. महादेवी कोल्हापुरात परत येणार का, हे पाहणे महत्त्वाचे ठरेल.