Solapur Crocodile | सोलापूरच्या देगाव परिसरात मगरीची दहशत, नगरसेवकांकडून पर्यावरण मंत्र्यांना हाक

सोलापुरातील देगाव परिसरातील नाल्यात मगर आढळल्याने स्थनिकांमध्ये भीतीचं वातावरण पसरले आहे. मागील चार दिवसांपासून या मगरीची दहशत आहे. मात्र आतापर्यंत या मगरीला पकडण्यात आलेलं नाहीए. स्थानिक लोकप्रतिनिधींनी वन विभाग तसेच प्राणी संग्रहालयाशी संपर्क केला असता संबंधित विभागाकडे मगर पकडण्यासाठी पुरेशी यंत्रणा नसल्याचे उत्तर मिळत आहे. त्यामुळे स्थानिक नगरसेवक गणेश वानकर यांनी पर्यावरण मंत्री आदित्य ठाकरे यांच्याकडे मदतीची मागणी केली आहे. मगर आढळलेल्या ठिकाणापासून अवघ्या 100 मीटरवर नागरी लोकवस्ती आहे. तर नाल्याच्या परिसरात लोक शेती देखील करतात. याच नाल्यात मोटार पंपाद्वारे पाणी उपसा करून शेतीसाठी वापरण्यात येतं. मोटार खराब झाली की शेतकऱ्यांना या नाल्यात उतरावं लागतं. त्यामुळे दुर्घटना होण्याची शक्यता आहे. स्थानिक नागरिकांच्या माहितीनुसार या ठिकाणी दोन मगर आहेत. त्यामुळे लवकरात लवकर या मगरीला ताब्यात घेण्यात यावं अशी मागणी स्थानिक नगरसेवक गणेश वानकर यांनी केली आहे.