Omicron Variant : ओमिक्रॉनसाठी नवी लस ? बायोएनटेक कंपनीत लस विकसित करण्याचं काम सुरू

एकीकडे ओमिक्रॉनची दहशत जगभरात पसरत असतानाच आता त्याबाबत काहीशी दिलासादायक बातमी. बायोएनटेक कंपनीने कोविड विषाणूच्या ओमिक्रॉन व्हेरियंटवर लागू होईल अशी लस विकसित करण्याचं काम सुरू केलं आहे. बायो एन टेक म्हणजे अमेरिकेत फायझरसोबत मिळून सध्याची कोविड लस विकसित करणारी कंपनी आहे. ओमिक्रॉनचा संसर्ग पसरत असल्याचे लक्षात येताच कंपनीने त्यावर काम करणं सुरु केलं असल्याचं बायोएनटेककडून सांगण्यात येतंय. (B.1.1.529) हा प्रकार जगभर पसरण्याची शक्यता गृहित धरुन लसीमध्ये आवश्यक ते बदल करत असल्याचंही कंपनीकडून सांगण्यात येत आहे. सध्याची लस ओमिक्रॉनवर किती प्रभावी ठरते हे येत्या दोन आठवड्यात कळेल आणि मग त्या निष्कर्षावर आधारीत आवश्यक बदल केले जातील. या व्हेरियंटचा धोका वाढलाच तर जास्तीत जास्त 100 दिवसांच्या आत यावरची नवी लस बाजारात आणण्याची तयारी असल्याचं बायोएनटेकच्या प्रवक्त्याने सांगितलं आहे.