Mira Road Bakri Eid Row : कुर्बानीसाठी आणलेल्या बकऱ्यांवरुन वाद-राडा Special Report

बकरी ईदच्या निमित्तानं मुंबईत पुन्हा एकदा राजकारण रंगलेलं पाहायला मिळतंय. मुंबई जवळच्या मिरा रोडमध्ये यावर्षीही जोरदार राडा पाहायला मिळाला... गेल्या वर्षी राडा झालेल्या जेपी इन्फ्रा सोसायटीत काल पोलिसांनी रुट मार्च काढत सूचक इशारा दिला खरा.. मात्र, याच भागातील एका सोसायटीत कालपासून बकरे ठेवण्यावरून जोरदार राडा झाला... काय आहे हा नेमका सगळा प्रकार? पाहूयात...

मिरा रोडमधील या तणावाच्या पार्श्वभूमीवर मुंबईतही भाजपने या मुद्द्यावरून प्रशासनावर दबाव आणण्यास सुरुवात केली आहे. मुंबईतील हाउसिंग सोसायट्यांमध्ये नियमबाह्य पद्धतीने होणाऱ्या कुर्बानी रोखण्यासाठी भाजप नेत्यांनी आक्रमक पवित्रा घेतला आहे. मुंबईच्या महापौर रितू तावडे यांच्यासह भाजपच्या अनेक ज्येष्ठ नेत्यांनी बृहन्मुंबई महानगरपालिका (BMC) आणि मुंबई पोलिसांना (Mumbai Police) पत्र पाठवले आहे. हाउसिंग कॉम्प्लेक्समध्ये कोणतीही बेकायदेशीर कुर्बानी होऊ नये, अशी मागणी या पत्रात करण्यात आली आहे.

या पत्रावर स्थायी समिती अध्यक्ष प्रभाकर शिंदे, भाजप गटनेते गणेश खनकर, मार्केट समिती अध्यक्षा हेतल गाला, आमदार मिहीर कोटेचा, आमदार अतुल भातखळकर, आमदार मनीषा चौधरी, माजी खासदार मनोज कोटक, आमदार पराग शाह आणि आमदार संजय उपाध्याय यांच्या स्वाक्षऱ्या आहेत. भाजपचे ज्येष्ठ नेते किरीट सोमय्या यांनीही या मागणीला पाठिंबा दिला असून, "सोसायटी परिसरात नियमबाह्य पद्धतीने कुर्बानी होऊ नये आणि सर्वसामान्य नागरिकांना कोणताही त्रास होणार नाही, यासाठी प्रशासनाने कठोर कारवाई करावी," अशी मागणी केली आहे. बकरी ईदच्या तोंडावर या पत्रामुळे मुंबईतील राजकीय वातावरण तापण्याची शक्यता वर्तवली जात आहे.