Thackeray Brothers Unity : वरळीत 'विजय मेळावा', बाळा नांदगावकर यांच्याकडून पाहणी

मनसे नेते बाळा नांदगावकर आणि ठाकरेंच्या शिवसेनेचे युवासेनेचे सचिव साईनाथ दुर्गे यांनी वरळी डोम येथे भेट दिली. ५ जुलै रोजी वरळी डोम येथे होणाऱ्या 'विजय मेळाव्या'च्या तयारीची पाहणी करण्यासाठी ते उपस्थित होते. मनसेकडून संदीप देशपांडे आणि बाळा नांदगावकर, तर ठाकरेंच्या शिवसेनेकडून अनिल परब हे या नियोजनात सहभागी आहेत. या मेळाव्यामध्ये उद्धव ठाकरे आणि राज ठाकरे एकाच मंचावर दिसणार आहेत. महापालिका निवडणुका तोंडावर असताना, दोन भावांमध्ये युतीच्या चर्चा सुरू आहेत आणि हा कार्यक्रम त्याची नांदी ठरू शकतो का, असा प्रश्न उपस्थित झाला आहे. हिंदी सक्तीच्या जीआरविरोधात उद्धव ठाकरे आणि राज ठाकरे या दोघांनीही आवाज उठवला होता. "हिंदी सक्ती नको" अशी आग्रही भूमिका दोन्ही नेत्यांकडून मांडण्यात आली. जीआर रद्द झाल्यानंतर हा आपला विजय आहे असे म्हणत 'मराठी विजय दिवस' किंवा 'मराठी विजय मेळावा' आयोजित करण्यात आला आहे. या भव्य कार्यक्रमाचे आयोजन वरळीच्या एनएससीआय डोम येथे करण्यात आले आहे. निमंत्रण पत्रिका दोन्ही पक्षांच्या नेत्यांकडून एकत्र छापली जात आहे. दोन्ही पक्षांचे प्रमुख नेते त्यांचे नाव असलेल्या निमंत्रण पत्रिका वाटप करणार आहेत.