Mira Bhayandar Protest | मराठी एकजुटीचा एल्गार, MNS मोर्चाला अखेर परवानगी!

मीरा भाईंदर परिसरात मराठीच्या मुद्द्यावर मनसेने मोर्चा काढला. मराठी अमराठी वादातून हा मोर्चा आयोजित करण्यात आला होता. रात्री मनसे जिल्हाध्यक्ष अविनाश जाधवांना पोलिसांनी ताब्यात घेतले होते. सकाळी पोलिसांनी मोर्चाला परवानगी नाकारल्याने मीरा रोड, बालाजी हॉटेल चौकात पोलिस आणि आंदोलकांमध्ये संघर्ष झाला. शेकडो मनसे कार्यकर्ते, ठाकरेंच्या शिवसेनेचे कार्यकर्ते आणि स्थानिक नागरिक एकत्र आले होते. पोलिसांनी अनेक कार्यकर्त्यांना ताब्यात घेतले. मनसेच्या रणरागिणीही रस्त्यावर उतरल्या आणि त्यांची पोलिसांशी धक्काबुक्की झाली. मुख्यमंत्र्यांनी दखल घेतल्यानंतर दुपारी मनसेला त्याच मार्गावरून मोर्चा काढण्याची परवानगी मिळाली. परिवहनमंत्री प्रताप सरनाईक यांनी पोलिसांच्या कारवाईवर संताप व्यक्त केला. ते मोर्चात सहभागी होण्यासाठी मीरा रोडला दाखल झाले, मात्र मोर्चेकऱ्यांनी त्यांना 'पन्नास थुके एकदम ठोके' अशा घोषणा देत परत पाठवले. अविनाश जाधव यांनी सरनाईकांच्या वागणुकीवर नाराजी व्यक्त केली. मोर्चा संपल्यावर मीरा रोड स्टेशन परिसरात मनसे नेत्यांची सभा झाली. या सभेत ठाकरेंच्या शिवसेनेचे माजी खासदार राजेंद्र उपस्थित होते. मनसे नेत्यांनी मराठीचा अपमान करणाऱ्यांना इशारा दिला. यावेळी सुटका झालेले अविनाश जाधवही सहभागी झाले होते. "आम्ही हिंदू आहोत, पण हिंदी नाही," असे यावेळी सांगण्यात आले.