मुंबईच्या अंडर 19 संघाची कर्णधार जेमिमाचं खणखणीत द्विशतक

औरंगाबादमध्ये झालेल्या या सामन्यात जेमिमानं 163 चेंडूंमध्ये नाबाद 202 धावांची खेळी उभारली

औरंगाबाद : मुंबईच्या 19 वर्षांखालील मुलींच्या संघाची कर्णधार जेमिमा रॉड्रिग्सनं द्विशतक झळकावत प्रेक्षकांची मनं जिंकली आहेत. सौराष्ट्राविरुद्धच्या वन डे सामन्यात जेमिमाने डबल सेंच्युरी ठोकली. औरंगाबादमध्ये झालेल्या या सामन्यात जेमिमानं 163 चेंडूंमध्ये नाबाद 202 धावांची खेळी उभारली. तिच्या या द्विशतकाला 20 चौकारांचा साज होता. जेमिमानं 52 चेंडूंमध्ये अर्धशतक, तर 83 चेंडूंमध्ये शतकाचा टप्पा पार केला. जेमिमाने 116 चेंडूंत दीडशे धावांचा टप्पा ओलांडला होता. जेमिमाच्या शतकी खेळीच्या जोरावर मुंबईनं 347 धावांचा डोंगर उभा केला. त्यानंतर सौराष्ट्रचा डाव 62 धावात गुंडाळून मुंबईनं 285 धावांनी विजय साजरा केला.