Shardul Thakur Engagement : शार्दूल ठाकूरचा साखरपुडा, फॅन्सकडून खास क्षण सोशल मीडियावर शेअर, पाहा VIDEO

Shardul Thakur Engagement : मागील काही वर्षात क्रिकेटच्या उदयास आलेला भारताचा युवा स्टार अष्टपैलू क्रिकेटर शार्दूल ठाकूर लवकरच लग्नाच्या बेडीत अडकणार आहे. नुकताच त्याचा साखरपुडा पार पडला आहे.

Written By : abp majha web team | Edited By: shashankp | Updated at : 29 Nov 2021 12:14 PM (IST)

Shardul Thakur

मुंबई : भारतीयांसाठी क्रिकेट म्हणजे अगदी जीवकी प्राण त्यामुळेच भारतीयांना त्यांचे लाडके क्रिकेटपटूही तितकेच महत्त्वाचे त्यामुळे त्यांच्या छोट्या-मोठ्या सगळ्या गोष्टींना चाहते फॉलो करतात. अशात या खेळाडूंचं लग्न किंवा कोणताही समारंभ हाही चाहत्यांसाठी तितकाच महत्वाचा. दरम्यान भारताचा युवा स्टार क्रिकेटपटू शार्दूल ठाकूर (Shardul Thakur) हा देखील लवकरत लग्नबंधनात अडकणार असून नुकताच त्याचा साखरपुडा मुंबई येथे पार पडत आहे. शार्दूल त्याची गर्लफ्रेंड मित्ताली परुळकर (Mittali Parulkar) सोबत साखरपुडा करत असून त्यांच्या काही फॅन्सनी त्यांचे फोटो आणि व्हिडीओ सोशल मीडियावर शेअर केले आहेत. मुंबई क्रिकेट असोसिएशनच्या BKC येथील हॉलमध्ये शार्दूल ठाकूरच्या साखरपुडा मोजक्याच लोकांच्या उपस्थितीत पार पडला.

पालघरचा असणारा शार्दूल आधी आयपीएलमधून सर्वांसमोर आला होता. सुरुवातीला काही संघातून खेळण्यानंतर धोनीच्या कॅप्टन्सीखाली चेन्नई सुपरकिंगमध्ये शार्दूलचा खेळ खऱ्या अर्थाने बहरला. त्यानंतर भारतीय संघात स्थान मिळाल्यानंतर तिथेही त्याने आपली खास जागा बनवली. त्यात ऑस्ट्रेलिया दौऱ्यात त्याने वॉशिंग्टन सुंदर सोबत मिळून ठोकलेलं एक अर्धशतक भारतासाठी अत्यंत महत्त्वाचं ठरलं होतं. त्यामुळेच भारत मालिकाही जिंकला होता. त्यानंतर मर्यादीत षटकातही चमकदार कामगिरी करणारा शार्दूल एक महत्त्वाचा अष्टपैलू खेळाडू म्हणून भारतीय संघात आहे.

संघाला विकेटची गरज असताना विकेट घेणारा आणि अ़डचणीच्या काळात फलंदाजी सांभळणारा अशी शार्दूलची ओळख आहे. शार्दूलने तीनही प्रकारच्या क्रिकेटमध्ये भारताकडून पदार्पण केलं असून तो 4 कसोटी, 15 एकदिवसीय आणि 24 टी20 सामने खेळला आहे.

लग्न विश्वचषकानंतर

साखरपुडा पार पडल्यानंतर आता शार्दूलचं लग्न कधी हा प्रश्न सर्वांनाच पडला आहे. दरम्यान सूत्रांच्या माहितनुसार शार्दूलचं लग्न 2022 मध्ये पार पडणार आहे. तेही 2022 चा टी20 विश्वचषक पार पडल्यानंतर हे लग्न होणार असल्याचंही समोर येत आहे.