एक्स्प्लोर

कर्णधार शुभमन गिलची 'कसोटी', भारत विरुद्ध इंग्लंड पहिला कसोटी सामना आजपासून सुरु, प्लेइंग 11मध्ये कोणाला संधी?

भारत आणि इंग्लंड यांच्यातील 5 सामन्यांची कसोटी मालिका आजपासून सुरु होत आहे. पहिला सामना हेडिंग्ले येथील लीड्स स्टेडियमवर खेळवला जाणार आहे.

By : एबीपी माझा वेब टीम | Updated at : 20 Jun 2025 01:15 PM (IST)

ENG vs IND 1st Test Shubman Gill

ENG vs IND 1st Test : भारत आणि इंग्लंड यांच्यातील 5 सामन्यांची कसोटी मालिका आजपासून सुरु होत आहे. पहिला सामना हेडिंग्ले येथील लीड्स स्टेडियमवर खेळवला जाणार आहे. भारतीय वेळेनुसार दुपारी साडेतीन वाजता या सामन्याला सुरुवात होणार आहे. शुभमन गिलच्या (Shubman Gill) नेतृत्वाखाली भारताचा संघ कसोटी क्रिकेटचा एक नवीन टप्पा आजपासून सुरु करत आहे. दरम्यान, या सामन्यासाठी इंग्लंडने आपल्या प्लेइंग इलेव्हनची घोषणा केली आहे. परंतू भारतीय संघात क्रमांक 3 आणि क्रमांक 6 वर कोणाला संधी मिळेल याचा निर्णय अद्याप बाकी आहे.

लीड्स स्टेडियमवर भारताने 7 पैकी 2 सामने जिंकले 4 गमावले तर एक अनिर्णित

हेडिंग्ले येथील लीड्स स्टेडियमवर भारत आत्तापर्यंत 7 सामने खेळला आहे. त्यात 2 जिंकले आहेत आणि 4 सामने गमावले आहेत. तर 1 सामना अनिर्णित राहिला आहे. या सामन्यात भारतीय संघातील क्रमांक 3 आणि क्रमांक 6 च्या फलंदाजांबद्दलही सस्पेन्स आहे. या महत्त्वाच्या सामन्यात संघ 2 फिरकी गोलंदाजांचा ट्रम्प कार्ड खेळू शकतो अशीही शक्यता आहे. तसेच रोहित, कोहली, अश्विन यांच्यानंतर, भारताचा हा पहिला कसोटी सामना शुभमन गिलच्या खांद्यावर एक मोठी जबाबदारी आहे. गिलने आतापर्यंत 32 कसोटी सामने खेळले आहेत आणि त्याची सरासरी 35.05 आहे. परंतू त्याने बहुतेक कसोटी सामन्या कठीण खेळपट्ट्यांवर खेळल्या आहेत. जिथे टॉप-7 फलंदाजांची सरासरी फक्त 32.10 आहे. आता गिलला पहिल्यांदाच कर्णधार म्हणून येऊन स्वतःची ओळख निर्माण करण्याची संधी आहे. तो भारताचा 37 वा कसोटी कर्णधार होणार आहे. गिल हा 25 वर्षे आणि 285 दिवस वयाचा भारताचा पाचवा सर्वात तरुण कसोटी कर्णधार आहे.

भारतीय संघ 2 स्पिनर्ससह मैदानात उतरण्याची शक्यता?

या सामन्यात भारताचा प्लेइंग इलेव्हन कसा असेल याबद्दलही सस्पेन्स आहे. नंबर 3 आणि नंबर 6 साठी 5 पैकी दोन नावे निवडायची आहेत. यामध्ये करुण नायर, साई सुदर्शन, ध्रुव जुरेल, अभिमन्यू ईश्वरन आणि नितीश रेड्डी यांचा समावेश आहे. अष्टपैलू खेळाडू म्हणून नितीश रेड्डीकडे तिसरा पर्याय म्हणूनही पाहिले जात आहे. 8 व्या क्रमांकावर संघाला शार्दुल ठाकूर, नितीश रेड्डी किंवा कुलदीप यादव यापैकी एकाची निवड करावी लागेल. रवींद्र जडेजासोबत कुलदीप यादवला प्लेइंग इलेव्हनमध्ये समाविष्ट केले जाईल की नाही. लीड्सच्या खेळपट्टीवर फिरकीपटूंनाही मदत मिळू शकते, अशा परिस्थितीत, जर भारतीय संघ 2 स्पिनर्ससह मैदानात उतरला तर तो इंग्लंड संघावरही मात करु शकतो.

भारताची संभाव्य प्लेइंग 11:

1. यशस्वी जैस्वाल, 2. केएल राहुल, 3. बी साई सुदर्शन, 4. शुभमन गिल (कर्णधार), 5. ऋषभ पंत (यष्टीरक्षक), 6. करुण नायर, 7. रवींद्र जडेजा, 8. शार्दुल ठाकूर/रेड्डी/कुलदीप 9 प्रसिद्ध कृष्णा, 10. जसप्रीत बुमराह, 11. मोहम्मद सिराज

इंग्लंडचा प्लेइंग 11

1) जॅक क्रॉली, 2) बेन डकेट, 3) ऑली पोप, 4) जो रूट, 5) हॅरी ब्रूक, 6) बेन स्टोक्स (कर्णधार), 7) जेमी स्मिथ (यष्टीरक्षक), 8) ख्रिस वोक्स, 9) ब्रायडन कार्स, 10) जोश टंग 11) शोएब बशीर.

इंग्लंडकडे पूर्वीसारखे वेगवान गोलंदाज नाहीत, भारतासाठी दिलासादायक

या कसोटी मालिकेत भारतासाठी एक सकारात्मक गोष्ट म्हणजे इंग्लंडचा वेगवान गोलंदाजीचा हल्ला, जो आता पूर्वीसारखा राहिलेला नाही. स्टुअर्ट ब्रॉड आणि जेम्स अँडरसनसारखे अनुभवी खेळाडू इंग्लंड संघातून निवृत्त झाले आहेत. इंग्लंड संघाची वेगवान गोलंदाजी अनुभवाअभावी झगडत आहे. मार्क वूड आणि ऑली स्टोनसारखे प्रमुख गोलंदाज दुखापतीमुळे बाहेर आहेत. गस अ‍ॅटकिन्सन आणि जोफ्रा आर्चर (जे 4 वर्षांनंतर परतले आहेत) दुसऱ्या कसोटीत संघात येऊ शकतात, परंतु पहिल्या कसोटीतून बाहेर आहेत. मालिकेच्या पहिल्या सामन्यासाठी संघात ब्रायडन कार्स आणि जोश टोंग यांचा समावेश आहे, ज्यांना एकत्रितपणे फक्त 8 कसोटींचा अनुभव आहे. ऑफ-स्पिनर शोएब बशीरने आतापर्यंत फक्त 1 कसोटी खेळली आहे. संघात पाचवा गोलंदाज निश्चित नाही, त्यामुळे कर्णधार बेन स्टोक्सला स्वतः जास्त षटके टाकावी लागू शकतात. अशा परिस्थितीत, अनुभवी अष्टपैलू खेळाडू ख्रिस वोक्स संघासाठी खूप महत्त्वाचा ठरू शकतो. त्याने इंग्लंडमध्ये शानदार गोलंदाजी केली आहे.

भारत आणि इंग्लंड यांच्यातील कसोटी मालिकेचा आजपर्यंतचा इतिहास

भारत आणि इंग्लंड यांच्यातील एकूण कसोटी: 136

भारताने विजय मिळवला: 35
इंग्लंडने विजय मिळवला: 51
अनिर्णित: 50

भारत आणि इंग्लंड यांच्यातील एकूण कसोटी (इंग्लंडमध्ये)

एकूण कसोटी: ६७

भारताने विजय मिळवला: 9
इंग्लंडने विजय मिळवला: 36
अनिर्णित: 22

भारत आणि इंग्लंड यांच्यातील एकूण कसोटी (भारतात)

एकूण कसोटी: 69

भारताने विजय मिळवला: 26
इंग्लंडने विजय मिळवला: 15
अनिर्णित: 28