US vs Iran Conflict: डोनाल्ड ट्रम्प यांनी इराणवरील हल्ला का रोखला? आता पुढे काय होणार? जाणून घ्या A टू Z माहिती

US vs Iran Conflict: अमेरिकेचे राष्ट्राध्यक्ष डोनाल्ड ट्रम्प यांनी इराणवर होणारे लष्करी हल्ले रोखण्याचे आदेश दिले आहेत.

US vs Iran Conflict

Source : ABP Majha

US vs Iran Conflict: गेल्या अनेक महिन्यांपासून युद्धाच्या उंबरठ्यावर उभ्या असलेल्या पश्चिम आशियातून (West Asia) आता एक मोठी बातमी समोर आली आहे. अमेरिकेचे राष्ट्राध्यक्ष डोनाल्ड ट्रम्प (Donald Trump) यांनी इराणवर होणारे संभाव्य लष्करी हल्ले रोखण्याचे आदेश दिले आहेत. इराणच्या सर्वोच्च नेत्यांनी अमेरिकेने तयार केलेल्या शांतता कराराला मंजुरी दिली असल्याचा मोठा दावा ट्रम्प यांनी केला आहे. याच आठवड्याच्या शेवटी युरोपमधील एका देशात या ऐतिहासिक करारावर अधिकृत स्वाक्षरी होणार असल्याचे ट्रम्प यांनी पत्रकारांशी बोलताना स्पष्ट केले. या प्रसंगी अमेरिकेचे उपराष्ट्राध्यक्ष जेडी वेंस (JD Vance) उपस्थित राहतील, मात्र इराणतर्फे यात कोण सहभागी होणार हे अद्याप अनिश्चित आहे.

28 फेब्रुवारी 2026 रोजी इराण विरुद्ध अमेरिका आणि इस्रायल यांच्यात थेट संघर्ष (Conflict) सुरू झाला होता. तब्बल 40 दिवसांच्या भीषण लढाईनंतर तात्पुरती युद्धबंदी (Temporary Ceasefire) जाहीर झाली होती. मात्र, नुकतेच पुन्हा एकदा एकमेकांवर हल्ले प्रतिहल्ले सुरू झाल्याने परिस्थिती चिंताजनक बनली होती. ट्रम्प यांनी इराणला थेट धमकी दिली होती की, जर या करारावर स्वाक्षरी झाली नाही, तर इराणचे मुख्य तेल केंद्र असलेल्या 'खार्ग बेटावर' (Kharg Island) अमेरिका ताबा मिळवेल. या आर्थिक आणि लष्करी दबावानंतर अखेर इराण नरमल्याचे चित्र आहे.

या कराराला सौदी अरेबिया, इस्रायल, संयुक्त अरब अमिराती, कतार, तुर्की, बहरीन, कुवेत, जॉर्डन आणि इजिप्त या देशांनीही मान्यता दिली आहे. मात्र, हा करार पूर्ण होईपर्यंत होर्मुजच्या सामुद्रधुनीतील (Strait of Hormuz) नौदलाची नाकेबंदी कायम राहणार आहे.

US and Israel Demands : अमेरिका आणि इस्रायलच्या अटी  

1. इराणने आपला आण्विक कार्यक्रम पूर्णपणे मोडीत काढावा.

2. समृद्ध युरेनियमचा साठा अमेरिकेकडे सोपवावा.

3. बॅलिस्टिक क्षेपणास्त्र कार्यक्रम कायमचा बंद करावा.

4. हिजबुल्ला, हूती आणि हमास सारख्या संघटनांना मिळणारा निधी व पाठिंबा थांबवावा.

Iran Demands: इराणच्या अटी 

1. अमेरिका आणि पाश्चात्य देशांनी इराणवरील सर्व आर्थिक निर्बंध मागे घ्यावेत.

2. परदेशात जप्त केलेली इराणची मालमत्ता आणि निधी मुक्त करावा.

3. इस्रायलने लेबनॉनवरील हल्ले तातडीने थांबवावेत.

4. भविष्यात इराणवर हल्ला होणार नाही, याची लिखित हमी द्यावी.

G7 Summit in France: पुढे काय होणार? G7 शिखर परिषदेकडे जगाचे लक्ष

ट्रम्प यांनी अद्याप कराराचा अंतिम मसुदा जाहीर केला नसला तरी, फ्रान्समध्ये 15 ते 17 जून दरम्यान होणाऱ्या जी-7 शिखर परिषदेत (G7 Summit in France) यावर शिक्कामोर्तब होण्याची शक्यता आहे. ट्रम्प यांनी या परिषदेसाठी मध्य पूर्वेतील (Middle East) अनेक देशांना विशेष निमंत्रण दिले आहे.

दरम्यान, अनेक दशकांपासून एकमेकांचे कट्टर शत्रू राहिलेले इस्रायल आणि इराण खरोखरच शांततेसाठी तयार झाले आहेत का? अमेरिकेचा हा शांतता करार पश्चिम आशियात कायमस्वरूपी शांतता प्रस्थापित करू शकेल का? या सर्व प्रश्नांची उत्तरे या आठवड्याअखेर युरोपमध्ये होणाऱ्या स्वाक्षरीनंतरच स्पष्ट होतील. जागतिक स्तरावर या घडामोडींवर संरक्षण विश्लेषक बारीक लक्ष ठेवून आहेत.

राज्य आणि देश-विदेशातील महत्त्वाच्या बातम्या; पाहा व्हिडीओ

आणखी वाचा