Donald Trump : युद्ध की शांतता? अमेरिका-इराण चर्चेच्या दुसऱ्या फेरीसाठी तयार, डोनाल्ड ट्रम्प यांचा पुन्हा इशारा  

US Iran Conflict : अमेरिका-इराण तणावाच्या पार्श्वभूमीवर पाकिस्तानात दुसऱ्या फेरीच्या शांतता चर्चेची तयारी सुरू असून ट्रम्प प्रशासनाने विशेष प्रतिनिधी पाठवण्याचा निर्णय घेतला आहे.

US Iran Conflict

Source : ANI

नवी दिल्ली : पश्चिम आशियात वाढलेल्या तणावाच्या पार्श्वभूमीवर अमेरिका-इराण संघर्ष निर्णायक टप्प्यात पोहोचला आहे. अमेरिकेचे राष्ट्राध्यक्ष डोनाल्ड ट्रम्प (Donald Trump) यांनी जाहीर केलेल्या युद्धविरामाची मुदत संपत आली असताना, दोन्ही देशांमध्ये पुन्हा शांतता चर्चेची हालचाल सुरू झाली आहे.

या पार्श्वभूमीवर अमेरिका इस्लामाबाद (Islamabad) येथे दुसऱ्या फेरीच्या चर्चेसाठी प्रतिनिधीमंडळ पाठवणार असून विशेष दूत स्टीव विटकॉफ (Steve Witkoff) यांच्या नेतृत्वाखाली ही चर्चा होणार आहे. यामध्ये ट्रम्प यांचे जावई जेरेड कुशनर (Jared Kushner) यांचाही सहभाग असणार आहे.

US Iran Peace Talks : पाकिस्तानात दुसऱ्या फेरीची तयारी

मिळालेल्या माहितीनुसार, 21 एप्रिल रोजी अमेरिका आणि इराण यांच्यात दुसऱ्या फेरीची चर्चा होण्याची शक्यता आहे. पहिल्या फेरीनंतर तणाव कायम असला, तरी संवाद सुरू ठेवण्याचा प्रयत्न दोन्ही बाजूंनी केला जात आहे.

Pakistan Security Measures : कडेकोट सुरक्षा व्यवस्था

चर्चेच्या पार्श्वभूमीवर इस्लामाबाद आणि रावळपिंडी (Rawalpindi) येथे कडेकोट सुरक्षा तैनात करण्यात आली आहे. सुमारे 10 हजार जवान तैनात असून एलिट कमांडो, स्नायपर्स आणि विशेष फोर्सेसना सज्ज ठेवण्यात आले आहे. तसेच 26 एप्रिलपर्यंत शाळा आणि महाविद्यालयांना सुट्ट्या जाहीर करण्यात आल्या आहेत.

Trump Warning Iran : करार न झाल्यास गंभीर इशारा

राष्ट्राध्यक्ष ट्रम्प यांनी इराणला इशारा देताना सांगितले की, जर शांतता करार झाला नाही, तर अमेरिका कठोर पावले उचलेल. त्यांनी इराणच्या पायाभूत सुविधांवर कारवाई करण्याचा इशाराही दिला आहे. जर इराणने आपल्या अटी मान्य केल्या नाहीत तर त्या देशातील पूल आणि उर्जा प्रकल्प नष्ट करणार असा इशारा डोनाल्ड ट्रम्प यांनी दिला. 

Iran Military Warning : इराणकडूनही प्रत्युत्तराची तयारी

इराणचे वरिष्ठ लष्करी अधिकारी ब्रिगेडियर जनरल मोहम्मद-रजा नकदी (Mohammad Reza Naqdi) यांनी इशारा दिला आहे की, युद्ध पुन्हा सुरू झाल्यास नव्या क्षेपणास्त्रांनी हल्ले केले जातील. तसेच शस्त्रसंधी असली तरी क्षेपणास्त्र निर्मिती सुरू असल्याचे त्यांनी स्पष्ट केले.

Global War Risk : जागतिक संघर्षाची शक्यता

इराणकडून दिलेल्या इशाऱ्यांमुळे परिस्थिती अधिक गंभीर बनली आहे. युद्ध पुन्हा पेटल्यास ते केवळ प्रादेशिक न राहता जागतिक स्वरूप धारण करू शकते, अशी भीती व्यक्त केली जात आहे.

ही बातमी वाचा: