Mehul Choksi : कडेकोट सुरक्षाव्यवस्था, केवळ वकीलांच्या भेटीची परवनागी; अटी-शर्तींसह मेहुल चोक्सीची डोमेनिकातील रुग्णालयात रवानगी
Mehul Choksi : मेहुल चोक्सीला एका दिवसापूर्वी पोलिसांच्या सेलमधून डोमेनिकाच्या पोर्ट्समाउथमधील सरकारी क्वॉरंटाईन सेंटरमध्ये दाखल केलं होतं. चोक्सीच्या वकीलांचा दावा आहे की, मेहुल चोक्सीचं अपहरण करुन त्याला अँटिगुआहून डोमेनिकाला आणलं होतं. अशातच न्यायालयानं त्याला वैद्यकीय उपचारांसाठी अटी-शर्तींसह डोमेनिकातील रुग्णालयात दाखल करण्यास सांगितलं होतं.
Mehul Choksi : कर्जबुडव्या मेहुल चोक्सीची कोरोना चाचणी निगेटीव्ह आली आहे. परंतु, त्याला पोलीस बंदोबस्तात रुग्णालयातच ठेवण्यात आलं आहे. रुग्णालयात मेहुल चोक्सीला केवळ आपल्या वकीलांचीच भेट घेण्याची परवानगी आहे. एबीपी न्यूजला स्थानिक सुत्रांनी यासंदर्भातील माहिती दिली. दरम्यान, पंजाब नॅशनल बँकेची 13500 कोटींची फसवणूक करणारा मेहुल चोक्सी अँटिगा आणि बार्बुडा या कॅरेबियन बेटावरुन फरार झाला होता. त्याला डोमिनिकामध्ये अटक करण्यात आली आहे.
मेहुल चोक्सीला एका दिवसापूर्वी पोलिसांच्या सेलमधून डोमेनिकाच्या पोर्ट्समाउथमधील सरकारी क्वॉरंटाईन सेंटरमध्ये दाखल केलं होतं. चोक्सीच्या वकीलांचा दावा आहे की, मेहुल चोक्सीचं अपहरण करुन त्याला अँटिगुआहून डोमेनिकाला आणलं होतं. त्या दरम्यान, त्याच्यासोबत मारहाण करण्यात आली होती. अटक झाल्यानंतरचा पहिला फोटो हाती लागला आहे. चोक्सीचा हा फोटो डोमिनिकातील तुरुंगातील असल्याचं समोर आलं होतं. मेहुल चोक्सीच्या शरीरावर जखमांच्या खुणा असल्याचं या फोटोंमध्ये दिसलं होतं. तसेच या फोटोमध्ये या फोटोत चोक्सीचा एक डोळा खूप लाल दिसून येत होता. दरम्यान, या प्रकरणात मेहुलचे वकील आणि सरकारला 1 जूनपर्यंत प्रतिज्ञापत्र दाखल करण्याची मुदत दिली आहे. त्यानंतर 2 जून रोजी या प्रकरणी खुल्या न्यायालयात सुनावणी पार पडणार आहे.
हा खटला कोर्टात पोहोचण्यापूर्वी डोमेनिका सरकार मेहमूलला पुन्हा अँटिगा येथे पाठवण्याची तयारी करत होती. तसेच, अँटिगाचे पंतप्रधान गॅस्टन ब्राऊन यांनी अनेकदा मेहुल चोक्सीला भारताकडे सोपवण्यास सांगितलं होतं.
28 मे रोजी पार पडलेल्या सुनावणीमध्ये न्यायालयानं सुनावणी पूर्ण होईपर्यंत मेहुल चोक्सीला डोमेनिकामध्येच ठेवण्याचे आदेश दिले आहेत. तसेच वैद्यकीय उपचारांसाठी डोमेनिका-चायना फ्रेंडशिप रुग्णालयात दाखल करण्यास सांगितलं होतं. या विषयावर कोणत्याही पक्षाला माध्यमांशी संवाद साधण्यास मनाई केली होती.
काय आहे प्रकरण?
काही दिवसांपूर्वीच मेहुल चोक्सी अँटिगा आणि बार्बुडा येथून फरार झाला होता. त्यानंतर इंटरपोलने त्याच्या विरोधात ‘यलो नोटीस’ जारी केली होती. या नोटीसनंतर डोमिनिकामध्ये त्याला अटक करण्यात आली होती. बुधवारी मेहुलच्या अटकेच्या बातमीनंतर अँटिगा आणि बार्बुडाचे पंतप्रधान गेस्टन ब्राऊनी म्हणाले की, मेहुल चोकसीला अँटिगाकडे न सोपवण्यास सांगितले आहे. मेहुलला भारतात पाठवण्याची गरज आहे. त्यामुळे त्याला भारताकडे देण्यास डोमिनिका सरकारला सांगितले आहे.
2018 साली जागतिक पोलीस संस्था इंटरपोलने जारी केलेल्या चोकसीविरोधात रेड नोटिसमुळे जगातील कोठेही इमिग्रेशन पॉईंटमध्ये चोकसीने प्रवेश केल्यास त्यांना सतर्क केले जाईल. तसेच भारतीय एजेन्सींना संशय आहे की चोकसी क्युबा इथे आहे. कारण अँटिगाप्रमाणेच क्युबाचाही भारताशी प्रत्यर्पण करार नाही. मेहुल चोकसी हा भारतात प्रत्यार्पण रोखण्यासाठी दीर्घकाळ कायदेशीर लढाई लढत आहे. त्याच्याकडे सध्या अँटिग्वानचे नागरिकत्व आहे. गेल्यावर्षी अँटिगाचे पंतप्रधान गॅस्टन ब्राउन म्हणाले होते की चोकसीचे सर्व कायदेशीर पर्याय संपले की त्याचं नागरिकत्व रद्द केले जाईल.
चोक्सीने याआधी असे म्हटलं होतं की, त्याच्यावरील आरोप खोटे, निराधार आणि राजकीय प्रयत्नांमुळे प्रेरित आहेत. पीएनबी घोटाळ्याप्रकरणी चोकसी याचा पुतण्या नीरव मोदी याला अटक केली आहे. काका प्रमाणेच मोदीने ही 2018 मध्ये भारतातून पळ काढला होता आणि सध्या तो युनायटेड किंगडममध्ये आहे. नीरव मोदीच्या भारत प्रत्यार्पणाचे प्रकरण ब्रिटिश सरकारने गेल्या महिन्यात मंजूर केले होते. तथापि मोदी अद्यापही या प्रत्यार्पणाच्या आदेशास यूके उच्च न्यायालयासमोर आव्हान देऊ शकतो. फेब्रुवारी 2019 मध्ये स्वाक्षरी केलेल्या आपल्या प्रत्यार्पणाच्या आदेशाविरोधात कोर्टात गेलेल्या विजय मल्ल्याच्या बाबतीतही या प्रक्रियेस काही महिने किंवा काही वर्षे लागू शकतात.
महत्त्वाच्या इतर बातम्या :
महत्त्वाच्या बातम्या
