बिघडत चाललेल्या परिस्थितीमुळे अफगाणिस्तानमधील मजार-ए-शरीफमधील राजदूतांना परत आणण्याचा भारताचा निर्णय

अफगाणिस्तानमधील बिघडत चाललेल्या परिस्थितीमध्ये भारताने मजार-ए-शरीफमध्ये काम करणाऱ्या आपल्या मुत्सद्यांना परत बोलावण्याचा निर्णय घेतला आहे. सरकारने अधिकाऱ्यांना आणण्यासाठी एक विशेष विमान पाठवले आहे.

संग्रहित छायाचित्र

नवी दिल्ली : अफगाणिस्तानमधील बिघडत चाललेली परिस्थिती पाहता भारताने कंधार नंतर मजार-ए-शरीफमधील आपले वाणिज्य दूतावास बंद करण्याचा निर्णय घेतला आहे. भारत सरकारने आपले मुत्सद्दी, अधिकारी आणि इतर भारतीयांना परत आणण्याचा निर्णय घेतला आहे. भारतीय अधिकारी बुधवारी सकाळपर्यंत भारतात पोहोचतील.

यासाठी एक विशेष विमान काबूलला पोहोचले असल्याची माहिती सरकारच्या उच्च सूत्रांनी दिली आहे. हे विमान मजार-ए-शरीफला उतरेल आणि भारतीय अधिकाऱ्यांसोबत आज संध्याकाळपर्यंत उड्डाण करू शकते. भारत सरकारने हा निर्णय अशा वेळी घेतला आहे, जेव्हा अफगाणिस्तानमधील मजार-ए-शरीफमधील सुरक्षा व्यवस्था बिघडत चालली आहे.

काही दिवसांपूर्वी अफगाणिस्तानच्या परराष्ट्रमंत्र्यांनी भारताचे परराष्ट्र मंत्री एस जयशंकर यांच्याशी चर्चा केली. या दोघांमध्ये संयुक्त राष्ट्र सुरक्षा परिषदेत अफगाणिस्तान-तालिबानवर विशेष चर्चा करण्याची मागणी होती. त्यानंतर या महत्त्वाच्या विषयावर तिथे चर्चा झाली.

या चर्चेदरम्यान भारताने स्पष्टपणे सांगितले होते की शांतता प्रस्थापित करण्यासाठी तालिबानने दहशतवादाचा मार्ग सोडून द्यावा आणि त्याचवेळी अल कायदा आणि इतर दहशतवादी संघटनांशी संबंध तोडावेत. भारताकडून सुरक्षा परिषदेत या चर्चेबद्दल असेही म्हटले गेले की तालिबान चर्चेच्या प्रक्रियेत दबाव वाढवण्यासाठी हिंसेचा मार्ग वापरू शकत नाही.

सध्या अफगाणिस्तानमध्ये लष्कर आणि तालिबान यांच्यात संघर्ष सुरू आहे. तालिबान शक्य तितक्या लवकर काबूल शहर पूर्णपणे काबीज करण्याचा प्रयत्न करत आहे, तर लष्कर या दहशतवाद्यांना शहराबाहेर काढण्याचा प्रयत्न करत आहे.

तालिबानने अफगाणिस्तानची दुसरी प्रांतीय राजधानी शेबर्गन शहर काबीज केलं 

तालिबानने अफगाणिस्तानची दुसरी प्रांतीय राजधानी शेबर्गन शहर ताब्यात घेतले आहे. एएफपी या वृत्तसंस्थेने याबाबत माहिती दिली आहे. उल्लेखनीय म्हणजे, अफगाणिस्तानातून अमेरिकन सैन्याच्या माघारीनंतर तालिबान पुन्हा देशात आपले पाय पसरत आहे आणि त्याने अनेक क्षेत्रांवर ताबा मिळवला आहे. अफगाणिस्तानमध्ये तालिबानचा हिंसाचार सुरूच आहे.

यापूर्वी अफगाणिस्तानची राजधानी काबूलमध्ये शुक्रवारी तालिबान्यांनी हल्ला करून अफगाण सरकारच्या राज्य मीडिया केंद्राच्या संचालकाची हत्या केली. अलीकडच्या काळात सरकारी अधिकाऱ्याच्या हत्येची ही ताजी घटना आहे. ही घटना अशा वेळी घडली आहे जेव्हा काही दिवसांपूर्वीच देशाचे काळजीवाहू संरक्षण मंत्री यांची हत्या करण्याचा प्रयत्न झाला होता.