Ajinkya Rahane Retirement: संयमाचा 'अजिंक्य' तारा
Ajinkya Rahane Retirement: ८५ कसोटी, ९० वनडे आणि २० टी-ट्वेन्टी. अजिंक्य रहाणेच्या करिअरचा हा स्कोअर. व्हाईट बॉल क्रिकेटपेक्षा पारंपरिक कसोटी सामन्यांमध्ये त्याची बॅट दुमदुमली. ५ हजारहून अधिक धावा. ३८.४६ ची सरासरी. १२ शतकं. त्यातली ८ परदेश भूमीवर. ही आकडेवारी अजिंक्यच्या दर्जाची आणि गुणवत्तेची साक्ष देणारी अशीच आहे. याच अजिंक्यने गरज लागली तेव्हा संघाचं सुकाणू हाती घेतलं. कांगारूंच्या भूमीवरची २०२०-२१ ची ती मालिका आठवा. पहिल्या कसोटीत भारत सर्वबाद ३६. दारुण पराभव पदरी. आत्मविश्वास जमिनीत गाडला गेला होता. त्यात कॅप्टन विराट कौंटुबिक कारणासाठी मायदेशी परतलेला. मालिकेत ०-१ ने पिछाडी. निेराशेचं मळभ दाटलं होतं. समोर अंधार पसरला होता. त्या काळोखातच पुढच्या मॅचमध्ये खेळताना मेलबर्नच्या मैदानातल्या गवतावर अजिंक्यने प्रेरणेची नवी वात पेटवली. कसोटी क्रिकेटचा तुटपुंजा अनुभव असलेले शिलेदार हाताशी घेऊन अजिंक्य लढला. संघ तीन बाद ६१ अशा स्थितीत अजिंक्यने शतकी नजराणा पेश केला. त्याच्या क्लासिक शतकाने मोठी आघाडी मिळवून दिली. मधल्या फळीत महत्त्वाच्या भागीदाऱ्या रचल्या. आपली टीम जिंकली. तिथूनच मालिका विजयाचं बीज संघात रोवलं गेलं.
ऑसी भूमीवर आपण सलग दुसरी कसोटी मालिका जिंकलो तेही तुलनेने नवख्या टीमला घेऊन. असाच आणखी तुरा त्याच्या शिरपेचात रोवला गेला. तो ऐतिहासिक लॉर्डसच्या मैदानात. जिथे रथीमहारथींना शतकाने हुलकावणी दिलीय. त्या मैदानातल्या ऑनर्स बोर्डवर अजिंक्य रहाणेचं नाव झळकलंय. करिअरची २०११ ते २०२३ अशी १२ वर्षे त्याने निष्ठेने संघाचं प्रतिनिधित्व केलं. २०१७-१८ नंतर त्याच्यासाठी संघातली स्पर्धाही आणखी तीव्र झाली. कालांतराने आंतरराष्ट्रीय संघातून बाहेर गेल्यावरही आयपीएलच्या मैदानात धडक देत राहिला. अखेर त्याने आता आपली बॅट म्यान केलीय. संयमाचा हा अजिंक्य तारा आता आंतरराष्ट्रीय क्रिकेटच्या मैदानात दिसणार नाहीये. डोंबिवली लोकलमधून क्रिकेटची किट बॅग घेऊन चर्चगेटपर्यंतचा प्रवास करणारा, पुढे आंतरराष्ट्रीय स्तरावर पताका दुमदुमत ठेवणारा अजिंक्य निवृत्तीची घोेषणा करताना म्हणाला, मी कधी चुकलो कधी हरलो, पण तुम्ही मला कधी परकं मानलं नाहीत. त्याला बोलताना आणि आपल्याला ऐकतानाही मन गलबलून आलं. अजिंक्यच्या निवृत्तीने संयमी क्रिकेट पर्वाची सांगता झाली. जंटलमन क्रिकेटर अजिंक्यला पुढच्या वाटचालीकरता शुभेच्छा.
महत्त्वाच्या बातम्या
ट्रेंडिंग न्यूज
