Tulsi Gabbard : एलाॅन मस्कनंतर आता तुलसी गॅबार्ड म्हणाल्या, मतदान पेपर बॅलेटने करावे, ईव्हीएम सहज हॅक करून निकाल बदलता येतात; नुकतीच भारत दौऱ्यात घेतली होती पीएम मोदींची भेट
Tulsi Gabbard : अमेरिकेच्या राष्ट्रीय गुप्तचर संचालक तुलसी गॅबार्ड म्हणाल्या की, निवडणूक निकालांमध्ये फेरफार करण्यासाठी ईव्हीएम सहजपणे हॅक केले जाऊ शकतात.
Tulsi Gabbard on EVM : भारतात वारंवार शंका घेतली जात असतानाच आता जागतिक महासत्ता असलेल्या अमेरिकेत सुद्धा इलेक्ट्रॉनिक मतदान यंत्रांबाबत (EVM) प्रश्न उपस्थित होऊ लागले आहेत. अमेरिकेच्या राष्ट्रीय गुप्तचर संचालक तुलसी गॅबार्ड म्हणाल्या की, निवडणूक निकालांमध्ये फेरफार करण्यासाठी ईव्हीएम सहजपणे हॅक केले जाऊ शकतात. म्हणूनच, मतदारांना निवडणुकीच्या पारदर्शकतेवर विश्वास ठेवण्यासाठी संपूर्ण अमेरिकेत कागदी मतपत्रिका (बॅलेट पेपर) लागू करण्याची गरज आहे. राष्ट्राध्यक्ष डोनाल्ड ट्रम्प यांच्या उपस्थितीत त्यांनी हे सांगितले. गॅबार्डचे हे विधान सोशल मीडियावर इतक्या वेगाने व्हायरल झाले की अमेरिकेत निवडणूक सुरक्षेवर एक नवीन वाद सुरू झाला. अनेक युझर्सनी गॅबार्ड यांचे समर्थन केले, तर काहींनी याला राजकीय अजेंडा म्हटले.
मस्क यांच्यानंतर आता गॅबार्ड यांचा ईव्हीएमला विरोध
एक दिवस आधी, ट्रम्प यांनी 2020 च्या निवडणुकीत माजी सायबरसुरक्षा प्रमुख ख्रिस क्रेब्स यांच्या भूमिकेची चौकशी करण्याचे निर्देश देणारा कार्यकारी आदेश न्याय विभागाला जारी केला होता. टेस्ला आणि स्पेसएक्सचे सीईओ एलोन मस्क यांनी गेल्या वर्षी ईव्हीएमवर प्रश्न उपस्थित केले होते. ते म्हणाले होते, आपण ईव्हीएम रद्द केले पाहिजेत. दरम्यान, भारतात, काँग्रेस नेते रणदीप सुरजेवाला यांनी गॅबार्ड यांच्या टीकेला उत्तर न दिल्याबद्दल भारतीय निवडणूक आयोग (ECI) आणि केंद्रातील भाजप सरकारवर प्रश्नचिन्ह उपस्थित केले. तसेच सर्वोच्च न्यायालयाने या प्रकरणाची स्वतःहून दखल घ्यावी अशी मागणी केली.
ECI ने म्हटले, आमचे EVM इतर देशांपेक्षा वेगळे
तुलसी गॅबार्ड यांनी अमेरिकन ईव्हीएमवर प्रश्न उपस्थित केल्यानंतर, भारतीय निवडणूक आयोगाने दावा केला आहे की आतापर्यंत झालेल्या मतदानात पाच कोटींहून अधिक व्हीव्हीपॅटची पुष्टी झाली आहे, जी ईव्हीएम मतांशी जुळताना बरोबर आढळली. भारतीय ईव्हीएम आणि इतर देशांच्या ईव्हीएममधील हे फरक आयोगाने सांगितले.
- ऑपरेटिंग सिस्टम : आमच्या ईव्हीएममध्ये ऑपरेटिंग सिस्टम नाही. अमेरिकन मशीन विंडोज किंवा लिनक्सवर चालते.
- कनेक्टिव्हिटी : भारतातील ईव्हीएम पूर्णपणे ऑफलाइन आहे. वाय-फाय किंवा ब्लूटूथ नाही. अमेरिकन मशीन्स इंटरनेटशी जोडलेल्या आहेत.
- प्रोग्रामिंग : एकदा आपल्या ईव्हीएममध्ये प्रोग्राम केले की ते बदलता येत नाही. अमेरिकन यंत्रात बदल शक्य आहे.
- VVPAT : आमच्या EVM मधील बटण दाबल्यानंतर, पुष्टीकरणासाठी एक स्लिप छापली जाते. अमेरिकन यंत्रात हे घडत नाही.
सुरजेवाला म्हणाले, निवडणूक आयोग आणि केंद्र सरकार गप्प का आहे?
काँग्रेस नेते रणदीप सिंग सुरजेवाला यांनी एक्स वर लिहिले की, अमेरिकेच्या राष्ट्रीय गुप्तचर संचालक गॅबार्ड यांनी ईव्हीएम हॅकिंगचा मुद्दा सार्वजनिकरित्या उपस्थित केला होता. मतदानाच्या निकालांमध्ये फेरफार करण्यासाठी ईव्हीएम असुरक्षित असतात. मुख्य निवडणूक आयुक्त आणि निवडणूक आयोगाचे अधिकृत हँडल या प्रकरणात गप्प का आहे? त्यांनी पुढे लिहिले की, पंतप्रधान, एनडीए सरकार आणि भाजप गप्प का आहेत? निवडणूक आयोग आणि मोदी सरकारने ईव्हीएम हॅकिंग आणि इतर भेद्यतेबद्दल सर्व तपशील गोळा करण्यासाठी आणि ईव्हीएममधील त्रुटींच्या आधारे आमच्या ईव्हीएमची तपासणी करण्यासाठी अमेरिकन सरकार आणि गॅबार्डशी संपर्क साधू नये का? त्यांनी लिहिले की 17 मार्च रोजी भारतात गॅबार्ड यांचा सन्मान करण्यात आला. आपण त्यांचे विधान नाकारतो हे योग्य आहे का? ज्यांचा आम्ही सन्मान केला. सर्वोच्च न्यायालयाने स्वतःहून या प्रकरणाची दखल घ्यावी.
एलाॅन मस्क म्हणाले ईव्हीएम हॅक होऊ शकते
दुसरीकडे दहा महिन्यांपूर्वी इलेक्ट्रॉनिक मतदान यंत्रावरून जगातील सर्वात श्रीमंत उद्योगपती एलाॅन मस्क यांनी 15 जून ईव्हीएम रद्द केले पाहिजे, असे म्हटले होते. ते मानव किंवा एआयद्वारे हॅक होण्याचा धोका आहे. जरी हा धोका कमी असला तरी तो खूप जास्त आहे. अमेरिकेत याद्वारे मतदान होऊ नये. यावर भाजप नेते आणि माजी आयटी मंत्री राजीव चंद्रशेखर म्हणाले की, मस्क यांच्या मते, कोणीही सुरक्षित डिजिटल हार्डवेअर बनवू शकत नाही, हे चुकीचे आहे. त्यांचे विधान अमेरिका आणि इतर ठिकाणी लागू होऊ शकते. जिथे ते इंटरनेट-कनेक्टेड मतदान यंत्रे तयार करण्यासाठी नियमित संगणकीय प्लॅटफॉर्म वापरतात.
इतर महत्वाच्या बातम्या
महत्त्वाच्या बातम्या
