Kalyan: कल्याणमध्ये शिवसेना शिंदे गट आणि भाजप समर्थकांमध्ये राडा, शिंदे गटाच्या कार्यकर्त्यांकडून भाजप कार्यकर्त्यांना मारहाण

Shivsena Vs BJP : भाजपचे कार्यकर्ते भिंतीवर भाजपचे चिन्ह रंगवत असल्याचा राग धरून शिवसेना शिंदे गटाच्या कार्यकर्त्यांनी त्यांना मारहाण केल्याची घटना घडली. 

Shivsena Vs BJP

Source : PTI

ठाणे : कल्याणमध्ये भाजप आणि शिवसेना शिंदे गटात कुरबुरी सुरू असल्याचे आज पुन्हा एकदा समोर आलं. कल्याण पूर्व चक्की नाका परिसरात भाजपचे चिन्ह भिंतीवर रंगवत असलेल्या भाजपच्या कार्यकर्त्यांना शिंदे गटाच्या नगरसेवकाच्या समर्थकांनी विरोध करत बेदम मारहाण केल्याची घटना घडली. या घटनेनंतर भाजपने देखील आक्रमक पवित्रा घेतला. भाजपचे कल्याण पूर्व शहर अध्यक्ष संजय मोरे यांनी आपल्या नगरसेवकांना आवरा अन्यथा आम्ही हात सोडू असा इशारा शिवसेना शिंदे गटाला दिलाय. याप्रकरणी कोळशेवाडी पोलीस ठाण्यात तक्रार नोंवणार असल्याचे त्यांनी सांगितले.

राज्यात शिवसेना शिंदे गट आणि भाजपच्या नेत्यांकडून युतीत सर्वकाही आलबेल असल्याचे सांगण्यात येत असले तरी कल्याण पूर्व विधानसभा मतदारसंघात शिवसेना शिंदे गट आणि भाजपामध्ये  कुरबुरी सुरूच असल्याचे दिसून येतंय.कल्याण चक्की नाका टेकडी परिसरात भाजपा कार्यकर्त्यांकडून भिंतींवर भाजपच्या पक्ष चिन्हाचे चित्र रंगवण्याचे काम सुरू होते. याच दरम्यान शिंदे गटाचे नगरसेवक मल्लेश शेट्टी यांचे समर्थक त्या ठिकाणी आले. त्यांनी भाजप कार्यकर्त्यांना विरोध केला आणि तीन ते चार कार्यकर्त्यांना लाथा बुक्क्यांनी बेदम मारहाण केली. 

शिवसेना नगरसेवक मल्लेश शेट्टी यांच्या सांगण्यावरूनच भाजप कार्यकर्त्याना मारहाण झाल्याचा आरोप भाजप शहराध्यक्ष संजय मोरे यांनी केला. यावेळी भाजप कल्याण शहराध्यक्ष संजय मोरे यांनी तुमच्या नगरसेवकांना आवरा अन्यथा आम्ही हात सोडू असा इशारा शिवसेना शिंदे गटाला दिला आहे. भाजप शहर अध्यक्षासह कार्यकर्ते कोळशेवाडी पोलीस ठाण्यात दाखल झाले. घडल्या प्रकाराबाबत कोळशेवाडी पोलीस ठाण्यात तक्रार देणार असल्याचे कार्यकर्त्यांनी सांगितले.  

डोंबिवलीतही शिंदे गट- भाजपात वाद

डोंबिवलीत (Kalyan Dombivli Latest News) एका भाजप पदाधिकाऱ्यावर त्यांच्याच पक्षाच्या महिला कार्यकर्तीकडे शरीरसुखाची मागणी केल्याचा गुन्हा जून महिन्यात दाखल करण्यात आला होता. यामागे शिवसेनेतील शिंदे गटाचा हात असल्याचा आरोप करत भाजपने डोंबिवलीत मोर्चा काढला होता. तसेच यापुढे शिंदे गटाला सहकार्य करणार नसल्याचा ठराव स्थानिक कार्यकर्त्यांनी केला होता. त्यावरुन शिवसेना आणि भाजपमध्ये वाद निर्माण झाला होता. 

नेमक्या याच कारणामुळे संतापलेल्या श्रीकांत शिंदेंनी थेट आपल्या खासदारकीचा राजीनामा देण्याचा इशारा दिला होता. शिवसेना-भाजपच्या युतीत क्षुल्लक कारणांसाठी मिठाचा खडा टाकण्याचं स्वार्थी राजकारण डोंबिवलीतल्या काही नेत्यांकडून सुरु असल्याचा आरोपही त्यांनी केला होता. त्यानंतर वरिष्ठ स्तरावर हा वाद मिटवण्यात आला. पण आता कल्याणमध्ये तशीच परिस्थिती निर्माण होतेय का काय असा प्रश्न विचारला जात आहे. 

ही बातमी वाचा: