Diva Railway Station : दिवावासियांची गर्दीतून मुक्तता होणार, रेल्वेच्या पादचारी पुलाच्या कामाचा 'श्री गणेशा'
Diva Railway Station : दिवा स्थानकाजवळ सकाळी आणि सायंकाळी बाजारपेठेत जाणाऱ्या नागरिकांची आणि प्रवाशांची मोठी गर्दी पाहायला मिळते तर चेंगराचेंगरी सदृश्य परिस्थिती ही अनेकदा होते.
Diva Railway Station : मध्य रेल्वेच्या दिवा रेल्वे स्थानकावरुन प्रवास करण्यांना दिलासा मिळणार आहे. दिवा रेल्वे स्थानकातील मुंबईच्या दिशेकडील पादचारी पुलाच्या रुंदीकरणाचे काम सुरु करण्यात आलं आहे. रेल्वेच्या पादचारी पुलाच्या कामाचा 'श्री गणेशा' झाला आहे. मध्य रेल्वेने या पादचारी पुलाच्या रुंदीकरणासाठी लागणाऱ्या खांब उभारण्याचे काम हाती घेतले आहे. दिवा रेल्वे स्थानकातील गर्दी पाहता रेल्वे प्रवासी संघटनांकडून पादचारी पुलाच्या रुंदीकरणाची मागणी सातत्याने केली जात होती. या मागणीची दखल घेत आता पूल रुंदीकरणाच्या कामाला सुरुवात झाली आहे.
दिवा रेल्वे स्थानकातील प्रवाशांना गर्दीतून मुक्तता मिळणार
दिवा रेल्वे स्थानकातून दररोज हजारो प्रवासी प्रवास करतात. मात्र अरुंद पुलामुळे प्रवाशांचे हाल होत होते. यामुळे पुलाच्या रुंदीकरणाची मागणी प्रवाशांकडून करण्यात येत होती. या मागणीची दखल घेत कल्याण लोकसभा मतदारसंघाचे खासदार डॉ.श्रीकांत शिंदे यांनी केलेल्या प्रयत्नांना यश आलं आहे. श्रीकांत शिंदे यांनी मध्य रेल्वे प्रशासनाशी बैठक घेऊन तसेच पत्रव्यवहार करून पुलाच्या रुंदीकरणाबाबत सातत्याने पाठपुरावा केला होता. या पाठपुराव्याला यश आले असून पुलाच्या रुंदीकरणाचे काम अखेर सुरु करण्यात आले आहे. पादचारी पुलाच्या रुंदीकरणामुळे येथून प्रवास करणाऱ्या प्रवाशांचा आणि नागरिकांचा गर्दीचा प्रश्न सुटणार आहे.
पादचारी पुलाच्या रुंदीकरणाच्या कामाला सुरुवात
दिवा रेल्वे स्थानकातून दररोज हजारो प्रवासी लोकलने मुंबई, कर्जत, कसारा, पनवेल, वसई येथे आपल्या नियमित कामासाठी प्रवास करतात. दिवा रेल्वे स्थानकातून कोकणात जाणाऱ्या रेल्वे प्रवाशांची संख्या मोठी आहे. याच पार्श्वभूमीवर कल्याण लोकसभा मतदारसंघाचे खासदार डॉ.श्रीकांत एकनाथ शिंदे यांच्या पुढाकाराने दिवा रेल्वे स्थानकाचा कायापालट प्रकल्प राबविण्यात आला होता. स्थानकात होम प्लॅटफॉर्म उभारणे, फलाटांचे रुंदीकरण आणि लांबी वाढविणे, शेडचे काम करणे यांसारखी कामे करण्यात आली होती. स्थानकातील रेल्वे फाटकातुन रूळ ओलांडल्याने होणाऱ्या अपघातांचे प्रमाण रोखण्यासाठी स्थानकात जाण्यासाठी आणि बाहेर पाडण्यासाठी सरकते जिने देखील बसविण्यात आले आहे.
प्रवासी संघटनांच्या मागणीची दखल
मुंबईच्या दिशेने असणारा आणि शहराच्या पूर्व भागाला जोडणारा पादचारी पूल अरुंद असल्याने प्रवाशांना कायमच गर्दीचा सामना करावा लागतो. दिवा शहरातील बहुतांश लोकवस्ती शहराच्या पूर्व भागात आहे. मुख्य बाजारपेठही शहराच्या पूर्व भागातच आहे. यामुळे या स्थानकात सकाळी आणि सायंकाळी बाजारपेठेत जाणाऱ्या नागरिकांची आणि प्रवाशांची मोठी गर्दी पाहायला मिळते तर चेंगराचेंगरी सदृश्य परिस्थिती ही अनेकदा होते. याच पार्श्वभूमीवर येथील प्रवासी संघटनांकडून पुलाच्या रुंदीकरणाचे काम करण्याची मागणी करण्यात येत होती.
महत्त्वाच्या बातम्या
ट्रेंडिंग न्यूज
