Ashadhi Wari 2022 : मुख्यमंत्र्यांच्या दौऱ्यासाठी जिल्हा प्रशासनाचं निवडणूक आयोगाला पत्र, परवानगीनंतरच एकनाथ शिंदे महापूजा करु शकणार

मुख्यमंत्र्यांच्या हस्ते रविवारी पहाटे विठूरायाची शासकीय महापूजा होणार आहे. मात्र आता आचारसंहिता लागू झाल्याने मुख्यमंत्र्यांच्या या दौऱ्यासाठी परवानगीबाबत जिल्हा प्रशासनाने राज्य निवडणूक आयोगाला पत्र लिहिलं आहे.

Eknath Shinde

Ashadhi Wari 2022 : आषाढी वारी सोहळ्यासाठी राज्याचे मुख्यमंत्री एकनाथ शिंदे आज पंढरपूर दौऱ्यावर येत असतानाच राज्यातील नगरपालिका निवडणूक जाहीर झाल्याने आचारसंहिता लागू झाली आहे. मुख्यमंत्र्यांच्या हस्ते रविवारी (10 जुलै) पहाटे विठूरायाची शासकीय महापूजा होणार आहे. मात्र आता आदर्श आचारसंहिता लागू झाल्याने मुख्यमंत्र्यांच्या या दौऱ्यासाठी परवानगीबाबत जिल्हा प्रशासनाने राज्य निवडणूक आयोगाला पत्र लिहिलं आहे. ही परवानगी निवडणूक आयोगाने दिल्यास मुख्यमंत्र्यांना पंढरपूर दौऱ्यावर येता येणार आहे.

मुख्यमंत्री एकनाथ शिंदे आज (9 जुलै) रात्री पंढरपूर इथे पोहोचणार होते. पंढरपुरातील शासकीय विश्रामगृह इथे आयोजित 'पर्यावरणाची वारी, पंढरीच्या दारी' या कार्यक्रमाचा समारोप सोहळा होणार आहे. एकादशी दिवशी पहाटे शासकीय महापूजा झाल्यावर पहाटे इस्कॉन आंतरराष्ट्रीय मंदिराचे भूमिपूजन कार्यक्रम होणार आहे. सकाळी अकरा वाजता सुंदर माझे कार्यालय, स्वच्छता दिंडी समारोप आणि दुपारी शिवसेना पक्षाच्या मेळाव्यास उपस्थिती लावणार आहेत. पंढरपुरातील सर्व कार्यक्रम आटोपल्यानंतर मुख्यमंत्री रविवारी दुपारी तीन वाजता सोलापूर विमानतळाकडे रवाना होतील आणि तेथून शासकीय विमानाने मुंबईला येतील. सायंकाळी साडेचार वाजता मुंबई विमानतळ येथे पोहोचतील, तेथून ठाण्याला जातील.  

आता आदर्श आचारसंहिता लागू झाल्यानंतर निवडणूक अयोग्य नेमक्या कोणत्या कार्यक्रमाला परवानगी देणार यावर मुख्यमंत्र्यांचा दौरा अवलंबून राहणार आहे. मात्र काही वर्षांपूर्वी कार्तिकी यात्रेला अशीच आचारसंहिता असताना तत्कालीन मंत्री चंद्रकांत पाटील यांना शासकीय महापूजेला परवानगी दिली होती.

यंदा विक्रमी संख्येने भाविक पंढरपुरात
आषाढी यात्रेसाठी पंढरी सजली असून आज संत तुकाराम महाराज आणि संत ज्ञानेश्वर महाराजांच्या पालखींचं पंढरपुरात आगमन होणार आहे. कोरोनामुळे 2 वर्षांनंतर पायी चालत वारकरी पंढरपुरात दाखल होत असल्यानं वारकऱ्यामध्ये आनंदाचं वातावरण आहे. दोन वर्षानंतर होत असलेली आषाढी यात्रा विक्रमी होत असून काल नवमीपर्यंत शहरात जवळपास सात लाखांपेक्षा जास्त भाविक दाखल झाले होते. एवढ्या मोठ्या संख्येने येणाऱ्या भाविकांच्या निवासाचा प्रश्न कायमच गंभीर असतो. मात्र, काही वर्षांपासून प्रशासनाने चंद्रभागेशेजारी असणाऱ्या 65 एकर जागेवर भक्तिसागर हे निवास क्षेत्र विकसित केले आहे. यंदा रेल्वेच्या ताब्यात असलेले 40 एकराचे क्षेत्र देखील प्रशासनाला मिळाल्याने यंदा 105 एकर जागेत तब्बल 5 लाख भाविकांच्या मोफत निवासाची व्यवस्था करण्यात आली आहे. आज दुपारपर्यंत जवळपास चार लाखांपेक्षा जास्त भाविक दाखल झाले असून वाटून दिलेल्या प्लॉटवर त्यांनी आपले तंबू उभारले आहेत. या ठिकाणी पिण्याचे आणि वापराचे शुद्ध पाणी, आरोग्य व्यवस्था, स्वच्छतागृहे, वीज, डांबरी रस्ते आणि सुरक्षेसाठी पोलिसांची व्यवस्था केल्याने यंदा प्रथमच या ठिकाणी पाच लाखांपेक्षा जास्त भाविकांना येथे निवासाची सोय झाली आहे.  

संबंधित बातम्या