Sangli News : सांगलीमधील तब्बल चार माजी आमदार एकाचवेळी अजितदादांच्या गळाला; मुंबईत होणार पक्षप्रवेश!
या पक्षप्रवेशाने सांगली जिल्ह्यात अजितदादा पवार पक्षाची ताकद वाढणार असून याचा परिणाम जिल्हा परिषद, पंचायत समित्या आणि नगरपालिका निवडणुकीत दिसून येणार आहे.
Sangli News : सांगली जिल्ह्यातील माजी चार आमदार लवकरच अजित पवार यांच्या राष्ट्रवादी पक्षात जाणार आहेत. लवकरच मुंबईत हा पक्ष प्रवेश होणार असल्याची सूत्रांची माहिती आहे. यामध्ये शिराळ्यातील शिवाजीराव नाईक, कवठेमहांकाळचे अजितराव घोरपडे, आटपाडीचे राजेंद्रअण्णा देशमुख आणि जतचे विलासराव जगताप यांचा समावेश आहे. या माजी आमदारांच्या बरोबरच जत आणि आटपाडी तालुक्यातील काही प्रमुख भाजप पदाधिकारी देखील अजित पवार यांच्या राष्ट्रवादीत प्रवेश करणार असल्याची माहिती आहे. यामध्ये नुकतेच भाजपच्या जिल्हा युवा मोर्चाच्या अध्यक्ष पदाचा आणि भाजप सदस्यत्वाचा राजीनामा दिलेल्या आटपाडीच्या अनिल पाटील आणि जतमध्ये भाजपमधून बंडखोरी करत अपक्ष निवडणूक लढवलेल्या तमनगौडा रवी पाटील यांचाही समावेश आहे.
अजित पवार यांच्या राष्ट्रवादीत होणाऱ्या या पक्षप्रवेशाने सांगली जिल्ह्यात अजितदादा पवार पक्षाची ताकद वाढणार असून याचा परिणाम जिल्हा परिषद, पंचायत समित्या आणि नगरपालिका निवडणुकीत दिसून येणार आहे. दुसरीकडे शिराळाचे माजी आमदार मानसिंगराव नाईक शरद पवार गटातच राहणार की अजित पवार गटात जाणार हे मात्र अद्याप स्पष्ट नसले तरी त्याच्या भूमिकेकडे जिल्ह्याचे लक्ष लागले आहे.
चार माजी आमदार अजित पवार यांच्या राष्ट्रवादीत प्रवेश करणार
सांगली जिल्ह्यात उपमुख्यमंत्री अजित पवार यांच्या राष्ट्रवादी काँग्रेस पक्षाकडून पक्ष वाढवण्याचे काम सुरु आहे.त्यामुळे सांगली जिल्ह्यातील चार माजी आमदार अजित पवार यांच्या राष्ट्रवादीत प्रवेश करणार आहेत. विधानसभा निवडणुकीनंतर जिल्ह्यात राजकीय अस्वस्थता असून भाजपमधून बाहेर पडूनही अद्याप महायुतीशी संधान असलेल्यांना राजकीय पर्याय दिसत नव्हता. अशा स्थितीत राष्ट्रवादी काँग्रेस अजित पवार गटाला मिळालेले मतदान लक्षात घेउन आजही जिल्ह्यात असलेली पक्षाची ताकद पुर्नस्थापित करण्यासाठी उपमुख्यमंत्री अजित पवार यांच्या कडून प्रयत्न केले जात आहेत. इस्लामपूर मतदारसंघात राष्ट्रवादी कडून विधानसभा निवडणूक लढवलेलेले निशिकांत भोसले-पाटील यांच्यावर राष्ट्रवादी वाढवण्याची जबाबदारी सोपवली आहे.
कवठेमहांकाळ तालुक्यातील माजी मंत्री राहिलेले माजी आमदार अजितराव घोरपडे यांनी विधानसभा निवडणुकीत माजी खासदार संजयकाका पाटील यांचा प्रचार केला होता, मात्र त्यांनी अजितदादा पवार पक्षात अधिकृत प्रवेश केला नव्हता. जतेचे माजी आमदार विलासराव जगताप हे भाजपत होते, मात्र विधानसभा निवडणुकीत भाजपने गोपीचंद पडळकर यांना उमेदवारी दिल्याने त्यांनी बंडखोर उमेदवारी केलेल्या रवि पाटील यांचा प्रचार केला. यामुळे त्यांना पक्षातून काढले होते. खानापूर-आटपाडी मतदार संघातील माजी आमदार राजेंद्रअण्णा देशमुख हे शरदचंद्र पवार पक्षात होते, मात्र विधानसभेचे तिकीट न मिळाल्याने त्यांनी अपक्ष निवडणूक लढवली.
मानसिंगराव नाईक काय भूमिका घेणार?
शिराळाचे माजी आमदार मानसिंगराव नाईक जरी शरद पवार गटात असले तरी अजित पवार यांच्याशी त्याचे राजकीय संबंध देखील उत्तम आहेत. त्यामुळे या सगळ्या पक्ष प्रवेशात मानसिंगराव नाईक आता उघडपणे अजित पवार यांच्या पक्षात जाणार का याकडे लक्ष लागले आहे.
महत्त्वाच्या बातम्या
