Sangli News : तपासणी नाके बंद करण्यासाठी राज्यातील वाहतूकदार संघटना आक्रमक; दोन ऑक्टोबरपासून चक्काजाम करण्याचा इशारा
तपासणी नाके बंद करण्याचे आश्वासन पीएम मोदी यांनी दिले होते. तरीही 13 राज्यांत नाके अद्याप सुरू आहेत. महाराष्ट्र, कर्नाटक व छत्तीसगड या राज्यांना नाके बंद करण्यासाठी 2 ऑक्टोबरपर्यंतची मुदत दिली आहे.
सांगली : वाहनांचे तपासणी नाके बंद करण्यासाठी राज्यातील वाहतूकदार संघटना आक्रमक झाल्या आहेत. महाराष्ट्र, कर्नाटक व छत्तीसगड राज्यांतील तपासणी नाके तत्काळ बंद करा अन्यथा 2 ऑक्टोबरपासून चक्काजामचा इशारा वाहतूकदार संघटनेनं दिला आहे. ऑल इंडिया मोटर ट्रान्सपोर्ट काँग्रेसच्या दिल्लीतील बैठकीत हा निर्णय झाला असल्याची माहिती वाहतूकदार संघटनेचे केंद्रीय कार्यकारिणी सदस्य बाळासाहेब कलशेट्टी यांनी सांगलीत (Sangli News) दिली.
नाके बंद करण्यासाठी 2 ऑक्टोबरपर्यंतची मुदत
देशभरातील तपासणी नाके बंद करण्याचे आश्वासन पंतप्रधान नरेंद्र मोदी यांनी दिले होते. तरीही 13 राज्यांत नाके अद्याप सुरू आहेत. महाराष्ट्र, कर्नाटक व छत्तीसगड या राज्यांना नाके बंद करण्यासाठी 2 ऑक्टोबरपर्यंतची मुदत दिली आहे. त्यानंतर या राज्यात चक्काजाम करावा लागेल. तपासणी नाक्यांवर मोठ्या प्रमाणात भ्रष्टाचार चालतो. त्यामुळे ते बंद झालेच पाहिजेत. शासनाने वाहतुकीचे किमान भाडे व त्याची व्याख्या निश्चित करावी, अशी मागणी वाहतूकदार संघटनेकडून करण्यात आली.
देशातील केवळ 13 राज्ये वगळता अन्य राज्यांनी तपासणी नाके बंद केले आहेत. याबाबत मंत्री शंभूराजे देसाई यांच्याशी संघटनेच्या प्रतिनिधींची बैठकही झाली आहे. सरकारकडून सकारात्मक प्रतिसाद मिळाला असला, तरी पर्याय शोधण्याचे काम सुरू आहे. सध्या आपण डिजीटल युगात वावरत असून ई-वे बिल असताना वाहन सुस्थितीत असल्याविना वाहतूक अशक्य आहे. असे असतानाही तपासणीच्या नावाखाली होत असलेला भ्रष्टाचार रोखण्यासाठी सरकारनेही पावले उचलण्याची गरज असल्याचे मत यावेळी व्यक्त करण्यात आले.
डिजिटल युगात आभासी चलनाचा पर्याय उपलब्ध झाला आहे. असे असताना वाहतुकीमध्ये वेळ जातो. प्रगत राष्ट्रामध्ये एका दिवसात 900 किलोमीटर वाहतूक होते, मात्र, आपल्या ठिकाणी केवळ अडीचशे किलोमीटर वाहतूक होते. महाराष्ट्रासह कर्नाटक व छत्तीसगड या राज्यातील तपासणी नाके हटविण्यात यावेत. अन्यथा, 2 ऑक्टोबरपासून वाहतूकदार संपावर जातील असा इशाराही त्यांनी यावेळी दिला. यावेळी सुरेंद्र बोळाज, महेश पाटील, नागेश म्हारगुडे, प्रितेश कोठारी आदी उपस्थित होते.
इतर महत्वाच्या बातम्या
महत्त्वाच्या बातम्या
ट्रेंडिंग न्यूज
