Pune Kasaba Peth Chinchwad By Election : कुटुंबातील एकाला उमेदवारी मिळावी; मुक्ता टिळकांचे पती शैलेश टिळक स्पष्टच बोलले
पुण्याच्या आमदार मुक्ता टिळक यांच्या निधनामुळे कसबा पेठ मतदारसंघाची पोटनिवडणूक, इच्छूक उमेदवारांची संख्या वाढू लागली. त्यात मुक्ता टिळकांचे पती शैलेश टिळक यांनी घरातील एकाला उमेदवारी मिळावी, अशी इच्छा व्यक्त केली आहे.
Pune Kasaba Peth chinchwad By Election: पुण्यातील कसबा पेठ विधानसभा मतदारसंघाच्या (Kasaba peth pune) आमदार मुक्ता टिळक (Mukta tilak) आणि चिंचवड विधानसभा मतदारसंघाचे आमदार लक्ष्मण जगताप (Laxman Jagtap) यांचे निधन झाल्याने या दोन मतदारसंघात 27 फेब्रुवारीला पोटनिवडणूक होणार आहे. भाजपच्या या दोन आमदारांच्या निधनानंतर या दोन मतदारसंघातील परिस्थिती काय असेल याकडे सर्वांचे लक्ष लागले आहे. भाजपकडून या दोन्ही जागांवर टिळक आणि जगताप यांच्या परिवारातूनच कुणाला तरी संधी दिली जाण्याची शक्यता आहे.
घरातील एकाला उमेदवारी मिळावी, मात्र : शैलेश टिळक
पुण्याच्या आमदार मुक्ता टिळक यांच्या निधनामुळे कसबा पेठ मतदारसंघाची पोटनिवडणूक, इच्छुक उमेदवारांची संख्या वाढू लागली. त्यात मुक्ता टिळकांचे पती शैलेश टिळक यांनी घरातील एकाला उमेदवारी मिळावी, अशी इच्छा व्यक्त केली आहे. मात्र हा निर्णय पक्षश्रेष्ठी घेत असतात. त्यांचा निर्णय अंतिम असेल, असंही ते म्हणाले. मुक्ता टिळकांनी मागील 20 वर्ष या परिसरात काम केलं आहे. महापौर असताना त्यांनी पायाभूत सुविधांवर काम केलं आहे. त्यानंतर आमदार असताना देखील त्यांनी उत्तम काम केलं. मात्र मागील 3 वर्षांपासून त्यांना त्यांची प्रकृती साथ देत नव्हती. त्यामुळे त्यांना जेवढं काम करणं शक्य झालं तेवढं त्यांनी केलं आहे. मात्र त्यांना अनेक कामं करायची होती. ते कामं त्या करु शकल्या नाहीत, असंही ते म्हणाले.
मागील 20 वर्षात महापौर असताना आणि त्यानंतर आमदार असताना त्यांनी उत्तम काम केलं. समस्या सोडवल्या. हे सगळं पाहता कसबा विधानसभा मतदार संघाची निवडणूक बिनविरोध व्हावी, अशी इच्छा असल्याचं देखील ते म्हणाले. त्यांच्या कुटुंबियांना उमेदवारी न दिल्यास इच्छुक उमेदवारांची संख्यादेखील मोठी आहे. त्यात महापालिकेचे माजी स्थायी समितीचे अध्यक्ष हेमंत रासने, पालिकेतील भाजपचे गटनेते गणेश बिडकर, खासदार गिरीश बापट यांच्या सुन स्वरदा बापट, नगरसेवक धीरज घाटे असे अनेकजण इच्छुक आहेत. कॉंग्रेस ही पोटनिवडणूक लढवण्याच्या तयारीत आहे.
कॉंग्रेसने कंबर कसली...
कॉंग्रेसकडून शहराध्यक्ष अरविंद शिंदे हे निवडणूक लढवण्यास इच्छुक आहेत. त्यांनी देखील या निवडणूकीसाठी कंबर कसल्याची माहिती आहे. उमेदवारांची नावं अजून समोर आले नसले तरी त्यांची तयारी सुरु झाल्याच्या चर्चा आहे. मात्र भाजपने मुक्ता टिळक यांच्या कुटुंबियांना तिकीट न दिल्यास कॉंग्रेस रोहित टिळक यांना उमेदवारी देऊ शकते. राष्ट्रवादीची या मतदारसंघात ताकद असल्याने निवडणूक झाल्यास राष्ट्रवादीची भुमिका देखील महत्वाची राहणार आहे.
महत्त्वाच्या बातम्या
