Dr. Vijay Bhatkar : महासंगणकाचे जनक आणि ज्येष्ठ संगणकशास्त्रज्ञ डॉ. विजय भटकर यांना २०२४ चा पुण्यभूषण पुरस्कार जाहीर

डॉ. विजय भटकर यांना पुण्यभूषण पुरस्कार जाहीर करण्यात आला आहे. या पुरस्काराचे यंदाचे हे 36 वे वर्ष आहे.

डॉ. विजय भटकर (फोटो सौजन्य- एबीपी माझा प्रतिनिधी)

पुणे : ज्येष्ठ शास्त्रज्ञ डॉ. विजय भटकर (Vijay Bhatkar) यांना संगणकशास्त्र क्षेत्रातील अतुलनीय योगदानाबद्दल २०२४ चा पुण्यभूषण पुरस्कार (Punyabhushan Award) जाहीर करण्यात आला आहे. डॉ.रघुनाथ माशेलकर यांच्या अध्यक्षतेखालील निवड समितीने या बहुमानाच्या पुरस्कारासाठी भटकर यांची निवड केली आहे. याचवेळी सीमेवर लढताना जखमी झालेल्या जवानांना आणि वीरमातेलाही गौरविण्यात येणार असल्याची माहिती पुण्यभूषण संस्थेचे संस्थापक अध्यक्ष डॉ. सतीश देसाई यांनी प्रसिद्धी पत्रकाव्दारे कळविली आहे.

पुरस्काराचे यंदाचे 36 वे वर्ष

पुरस्कराचे यंदाचे हे ३६ वे वर्ष आहे. या संस्थेने सलग ३५ वर्षे  महाराष्ट्र, देश तसेच देशाच्या बाहेरही ह्या प्रतिष्ठेच्या समजल्या जाणाऱ्या पुरस्काराचा भव्य उपक्रम राबविला. पुण्यभूषण पुरस्काराच्या स्मृतीचिन्हात बालशिवाजी, सोन्याच्या फाळाने पुण्याची भूमी नांगरत असलेली प्रतिकृती, पुण्याचे ग्रामदैवत यांचा सावेश आहे. स्मृतीचिन्ह तसेच दोन लाख रुपये असे या पुरस्काराचे स्वरुप आहे. 

दिग्गजांच्या हस्ते पुरस्काराचे वितरण

या पुरस्कार समारोहादरम्यान  सीमेवर लढताना जखमी झालेल्या ४ जवानांचा आणि एका वीरमातेचा मान्यवरांचे शुभहस्ते यथोचित गौरव करण्यात येतो. पुण्यभूषण पुरस्कार प्रदान समारंभ जुलै महिन्याच्या शेवटच्या आठवड्यात किंवा ऑगस्टच्या पहिल्या आठवड्यात होणाऱ्या दिमाखदार सोहळ्यात करण्यात येईल. देशातील प्रसिद्ध आणि प्रतिष्ठित व्यक्तींच्या हस्ते या पुरस्काराचे वितरण करण्यात येते. याआधी माजी राष्ट्रपती प्रणव मुखर्जी, डॉ. ए.पी.जे. अब्दुल कलाम, माजी उपराष्ट्रपती हमीद अन्सारी, व्यंकय्या नायडू, माजी पंतप्रधान अटलबिहारी वाजपेयी, लोकसभेचे माजी सभापती सोमनाथ चटर्जी, मनोहर जोशी, ज्येष्ठ नेते शरद पवार, स्वरसम्राज्ञी लता मंगेशकर, क्रिकेटपटू कपिल देव व सचिन तेंडूलकर, पांडुरंगशास्त्री आठवले, विलासराव देशमुख, ज्येष्ठ अभिनेते दिलीपकुमार, वसंतराव साठे, नानासाहेब गोरे, तत्कालीन राज्यपाल सी. सुब्रह्मण्यम्, मधु दंडवते, दि हिंदूचे संपादक एन. राम, न्यायमूर्ती चंद्रशेखर धर्माधिकारी, सुशिलकुमार शिंदे, सिताराम येचुरी, गिरीश कर्नाड, ज्येष्ठ साहित्यिक डॉ. एस. एल. भैरप्पा, महेश एलकुंचवार, पृथ्वीराज चव्हाण, डॉ. विकास आमटे, आशा भोसले, नारायणमूर्थी, शरद यादव, नितीन गडकरी, पं.हरिप्रसाद चौरसिया, पं. अमदजअली खान व पं. शिवकुमार शर्मा, प्रफुल्ल पटेल, ज्येष्ठ अभिनेत्री शर्मिला टागोर आणि ज्येष्ठ अभिनेते अनुपम खेर आदी मान्यवरांनी पुण्यभूषण पुरस्कार प्रदान करून नामांकित पुणेकरांचा यथोचित सन्मान केलेला आहे.

हेही वाचा >>