Pune Metro : काय म्हणता? पहिल्याच दिवशी 7 तासात तब्बल 22 हजार पुणेकरांचा मेट्रो प्रवास
Pune Metro :पंतप्रधान मोदींनी (PM Modi) पुणे मेट्रोचे उद्घाटन केल्यानंतर पुणेकरांसाठी मेट्रो प्रवास सुरू झाला आहे. उद्घाटनानंतरच्या काही तासातच तब्बल बावीस हजार 437 पुणेकरांनी मेट्रोने प्रवास केला आहे
Pune Metro : काल मोठ्या दिमाखात पुणे मेट्रोच्या उद्घाटनाचा कार्यक्रम पार पडला. पंतप्रधान नरेंद्र मोदींनी (PM Modi) पुणे मेट्रोचे उद्घाटन केल्यानंतर सर्वसामान्य पुणेकरांसाठी मेट्रो प्रवास सुरू झाला आहे. त्यानंतर उद्घाटन झाल्यानंतरच्या काही तासातच तब्बल बावीस हजार 437 पुणेकरांनी मेट्रोने प्रवास केला आहे. यामध्ये मोबाईल तिकीट काढणाऱ्यांची संख्याही लक्षणीय आहे. रविवारी दुपारी बारा वाजण्याच्या सुमारास पंतप्रधान नरेंद्र मोदी यांच्या हस्ते मेट्रोचे उद्घाटन झाल्यानंतर दुपारी तीन वाजता पुणे आणि पिंपरी-चिंचवड शहरातील मेट्रो व्यावसायिक तत्वावर सुरू करण्यात आल्या. त्यानंतर रात्री दहा पर्यंत या फेर्या सुरू होत्या.
उद्घाटनानंतर नंतर काही तासात वनाज ते गरवारे या मार्गावर 15842 प्रवाशांनी प्रवास केला आहे. तर पिंपरी ते फुगेवाडी या मार्गावर 4616 नागरिकांनी प्रवास केला आहे. रविवारी एकूण 22437 नागरिकांनी मेट्रोने प्रवास केला. यामध्ये 1979 प्रवाशांनी मोबाईलवरुन तिकीट काढले तर बाकीच्यांनी काऊंटरवरुन तिकीट खरेदी केले असल्याची माहिती आहे.
पंतप्रधानांनीही तिकीट काढून प्रवास केला
काल उद्घाटनाच्या कार्यक्रमात देशाचे पंतप्रधान नरेंद्र मोदी यांनी स्वत: तिकीट काढून गरवारे स्टेशन ते आनंदवाडीपर्यंतचा प्रवास केला. मेट्रो उद्घाटन कार्यक्रमानंतर बोलताना पंतप्रधानांनी म्हटलं होतं की, आधी भूमिपूजन व्हायचं मात्र उद्घाटन कधी होणार हे माहिती पडायचं नाही, असा टोला पंतप्रधान नरेंद्र मोदी यांनी पुणे मेट्रो लोकार्पणात लगावला. सध्याच्या काळात भूमिपूजन केल्यानंतर प्रकल्प वेळेत पूर्ण होऊ शकतात हे दाखवले असल्याचे पंतप्रधान मोदींनी म्हटलं होतं.. समाजातील सर्वच घटकांनी आता मेट्रोचा वापर करण्याची आवश्यकता असल्याचेही त्यांनी सांगितले होते.
सकाळी आठ ते रात्री नऊ पर्यंत मेट्रोने प्रवास करता येणार
सकाळी आठ ते रात्री नऊ पर्यंत मेट्रोने प्रवास करता येणार आहे. पुण्यात वनाझ ते रामवाडी दरम्यान पाच मेट्रो स्टेशनचे उद्घाटन झाले. मेट्रोने प्रवास करताना पहिल्या तीन स्टेशनसाठी दहा रुपये मोजावे लागतील तर पुढच्या दोन स्टेशनपर्यंत देखील प्रवास करायचा असेल तर आणखी दहा रुपये मोजावे लागतील. म्हणजे वनाझच्या पहिल्या स्टेशनपासून गरवारेच्या पाचव्या स्टेशनपर्यंत प्रवास करण्यासाठी वीस रुपये मोजावे लागतील.
दोन्ही मेट्रो तीन डब्यांच्या असणार
पिंपरी- ते फुगेवाडी या सात किलोमीटरच्या मार्गासाठी देखील वीस रुपये तिकीट असेल. सध्या या दोन्ही मेट्रो तीन डब्यांच्या असणार आहेत आणि प्रत्येक डब्यात 325 प्रवाश्यांना प्रवास करण्याची क्षमता असणार आहे. तीन डब्यांमधील एक डबा महिलांसाठी राखीव असणार आहे.
संबंधित बातम्या:
महत्त्वाच्या बातम्या
