वन खात्यात नोकरी मिळवून देण्याचं आश्वासन, 38 जणांची 1 कोटी 24 लाखांना फसवणूक
या सात जणांच्या टोळीने जानेवारी 2021 ते मे 2022 या दरम्यान वन खात्यात नोकरी लावतो असं सांगून 38 इच्छुक तरुणांची फसवणूक केली. यासाठी आरोपींनी तरुणांकडून 1 कोटी 26 लाख एवढी रक्कम घेतली.
बारामती : वन खात्यात नोकरी मिळवून देण्याचं सांगून पुणे जिल्ह्यामधल्या पुरंदर तालुक्यातील 38 जणांची 1 कोटी 26 लाख रुपयांची फसवणूक केल्याचा प्रकार घडला आहे. फसवणूक झालेल्या तरुणाने सासवड पोलीस ठाण्यात तक्रार दाखल केली आहे. तक्रारीवरुन सात जणांविरुद्ध फसवणुकीचा गुन्हा दाखल करण्यात आला आहे. सात पैकी पाच आरोपींना सासवड पोलिसांनी अटक केली असून दोघे पसार झाले आहेत. पोलीस त्यांचा शोध घेत आहेत.
या सात जणांच्या टोळीने जानेवारी 2021 ते मे 2022 या दरम्यान सासवड, जेजुरी, वीर, पिंपरी चिंचवड या परिसरातील जवळपास 18 गावातील 38 इच्छुक तरुणांची वन खात्यात नोकरी लावतो असं सांगून फसवणूक केली. यासाठी आरोपींनी तरुणांकडून 1 कोटी 26 लाख एवढी रक्कम घेतली. त्यासाठी त्यांनी बनावट नियुक्ती पत्र, ओळखपत्र, शिक्का, खाकी गणवेश असे विविध साहित्य वापरुन या 38 जणांकडून रोख स्वरुपात तसंच आपल्या बँक खात्यावर रक्कम जमा करुन घेतली.
अविनाश भोसले असं मुख्य तक्रारदाराचं नाव आहे. या तरुणाची 3 लाख 80 हजार रुपयांची फसवणूक झाली आहे. तर उर्वरित 37 जणांकडून या टोळीने असेच कमी जास्त पैसे घेतले होते. सासवड पोलीस या प्रकरणाचा अधिक तपास करत आहेत.
नामदेव मोरे (वय 57, रा. मोरेवस्ती, लिंगाळी, ता.दौंड, जि.पुणे), सुजाता पवार (वय 33, रा जेजुरी, ता.पुरंदर, जि.पुणे), हरिश्चंद्र जाधव वय 32, रा. मांडकी, पाटीलवस्ती, ता.पुरंदर, जि.पुणे), नरेश अवचरे (वय 38 , रा. कोडीत, ता.पुरंदर, जि.पुणे), राजेश पाटील (वय 60 रा. बोरावकेनगर, ता.दौंड, जि.पुणे), संतोष जमदाडे (वय 34 ,रा.वीर,ता पुरंदर जि पुणे) आणि अजित चव्हाण (वय 67, रा.वीर,ता पुरंदर जि पुणे) अशी गुन्हा दाखल झालेल्या आरोपींची नावं आहेत. यापैकी नामदेव मोरे आणि राजेश पाटील पसार झाले असून पाच जणांना अटक करण्यात आली आहे.
महत्त्वाच्या बातम्या
ट्रेंडिंग न्यूज
