पुण्यात भरधाव कार विहिरीत कोसळली, आईसह दोन चिमुरड्यांचा मृत्यू

सचिन कोतवाल हे पत्नी आणि मुलांना सासरवाडीतून घेऊन आपल्या घरी येत होते. अष्टापूर जवळ कॉर्नरला कुत्र्याला वाचवताना गाडी विहिरीत पडली.

पुणे : भरधाव कार विहिरीत पडून आईसह दोन चिमुरड्यांचा मृत्यू झाल्याची घटना पुणे जिल्ह्यातील हवेली तालुक्यातील अष्टपूर येथे घडली आहे. मंगळवारी रात्री 10 वाजेच्या समुरास ही घटना घडली आहे. आणखी एक जण या अपघातात गंभीर जखमी झाला आहे. शीतल कोतवाल (वय 35), श्रुष्टी (वय 9) आणि शौर्य (वय 6) अशी मृत्युमुखी पडलेल्यांची नावे आहेत.

मिळालेल्या माहितीनुसार, सचिन कोतवाल हे पत्नी आणि दोन मुलांसोबत चारचाकीने प्रवास करत होते. हवेली तालुक्यातील अष्टपूर गावाजवळून जात असताना त्यांचा कारवरील ताबा सुटला आणि चारचाकी रस्त्याच्या कडेला असलेल्या विहिरीत कोसळली. प्रसंगावधान राखत सचिन कोतवाल हे गाडीतून बाहेर आले. मात्र विहिरीत जास्त पाणी असल्याने आणि गाडीच्या काचा बंद असल्याने पत्नी आणि मुलांना त्यांना सुखरुप बाहेर काढता आले नाही त्यामुळे दुर्दैवाने या तिघांचा मृत्यू झाला.

सचिन कोतवाल हे पत्नी आणि मुलांना सासरवाडीतून घेऊन आपल्या घरी येत होते. अष्टापूर जवळ कॉर्नरला कुत्र्याला वाचवताना गाडी विहिरीत पडली. यावेळी सचिन गाडीतून बाहेर पडून पत्नी आणि मुलांना वाचवण्याचा प्रयत्न केला. मात्र गाडीच्या काचा बंद असल्याने त्यांचा प्रयत्न निष्फळ ठरला.