मोठी बातमी : पुण्यात भाजप आणि राष्ट्रवादी विरोधात लढणार, निवडणुका जाहीर होताच मुख्यमंत्र्यांनी शड्डू ठोकला
Pune Municipal Corporation : पुणे आणि पिंपरी चिंचवड निवडणुकीसाठी अजितदादांसोबत चर्चा झाली असून भाजप आणि राष्ट्रवादी एकमेकांच्या विरोधात लढेल असं मुख्यमंत्री देवेंद्र फडणवीसांनी जाहीर केलं.
मुंबई : राज्यातील 29 महापालिकांच्या निवडणुकीचा कार्यक्रम (Municipal Corporations Election Schedule) जाहीर झाल्यानंतर मुख्यमंत्री देवेंद्र फडणवीस यांनी पहिली प्रतिक्रिया दिली. आमच्या सरकारने केलेलं काम पाहता मुंबईसह सर्वच ठिकाणी जनतेचा कौल आमच्या बाजूने असेल असा विश्वास त्यांनी व्यक्त केला. राज्यात सर्वच ठिकाणी एकनाथ शिंदेंची शिवसेना ही भाजपसोबत असेल. तर पुण्यामध्ये (Pune Election), पिंपरी-चिंचवडमध्ये भाजप आणि राष्ट्रवादी एकमेकांसमोर उभे ठाकेल, पण ही मैत्रीपूर्ण लढत असेल असं मुख्यमंत्री म्हणाले.
राज्यातील 29 महापालिकांसाठी 15 जानेवारी रोजी मतदान होणार आहे, तर 16 जानेवारी रोजी त्याचा निकाल जाहीर होणार आहे. त्यामुळे सर्वच पक्षांनी आता कंबर कसल्याचं दिसून येतंय. पंतप्रधान नरेंद्र मोदी यांचे काम, तसेच महायुती सरकारने केलेले काम पाहता आम्हाला संधी मिळेल असं मुख्यमंत्री म्हणाले.
NCP Vs BJP " पुणे-पिंपरी चिंचवडमध्ये राष्ट्रवादीच्या विरोधात लढणार
राज्यात बहुतांश ठिकाणी भाजप आणि शिवसेना एकत्र लढणार आहे. पुणे आणि पिंपरी चिंचवडमध्ये मात्र भाजप आणि अजितदादांची राष्ट्रवादी एकमेकांच्या विरोधात लढणार असल्याचं मुख्यमंत्र्यांनी सांगितलं.
देवेंद्र फडणवीस म्हणाले की, "पुणे आणि पिंपरी चिंचवडमध्ये अजितदादांची राष्ट्रवादी आणि भाजप हे एकत्र लढू शकणार नाहीत. त्यावर अजितदादांशी चर्चा झाली आहे. आम्ही जर एकत्र लढलो तर त्याचा फायदा हा विरोधकांना होणार हे इतकं राजकारण आम्हाला दोघांनाही समजतं. त्यामुळे दोन्ही पक्ष एकमेकांच्या विरोधात लढणार असून ती मैत्रीपूर्ण लढत असेल.
BJP Shivsena Alliance : एकनाथ शिंदे भाजपच्या सोबत
नगरपालिका निवडणूक एकमेकांच्या विरोधात लढलेले शिवसेना आणि भाजप हे महापालिका निवडणुकीत मात्र एकत्रित दिसणार आहेत. एकनाथ शिंदे यांची शिवसेना आमच्यासोबत असेल असं मुख्यमंत्र्यांनी स्पष्ट केलं आहे.
मतदारयादीतील घोळावरुन विरोधक सातत्याने निवडणूक आयोग आणि सत्ताधाऱ्यांना धारेवर धरतात. त्यावर प्रतिक्रिया देताना देवेंद्र फडणवीस म्हणाले की, थोड्या काही प्रमाणात मतदार याद्यांमध्ये घोळ असतो, ते आम्हीही दाखवलं आहे. पण त्यामुळे निवडणूकच घ्यायच्या नाहीत हे मत चुकीचं आहे. येत्या काळात एसआयआर प्रक्रियामुळे मतदार याद्यातील घोळ कमी होईल. पण निवडणूक आयोगाने पुढील काळात या याद्या ब्लॉक चेन मध्ये टाकाव्यात, म्हणजे सगळाच घोळ संपून जाईल.
Municipal Corporations Election Schedule : महापालिकेच्या निवडणुकीच्या तारखा
- नामनिर्देशन पत्र स्वीकारणे - 23 डिसेंबर ते 30 डिसेंबर
- अर्जाची छाननी - 31 डिसेंबर
- उमेदवारी माघारीची मुदत - 2 जानेवारी
- चिन्ह वाटप आणि अंतिम उमेदवार यादी - 3 जानेवारी
- मतदान - 15 जानेवारी
- निकाल - 16 जानेवारी
ही बातमी वाचा:
महत्त्वाच्या बातम्या
