Solapur : सोलापुरात उमेदवाराचा भयंकर कारनामा; 10 पैकी 5 सूचकांच्या बोगस सह्या, विधान परिषदेचा अर्ज बाद; फौजदारी गुन्हा दाखल होणार?

Solapur Vidhan Parishad Election : सोलापूर स्थानिक स्वराज्य संस्था विधान परिषद निवडणुकीत 'न्यू राष्ट्रीय समाज पार्टी'चे उमेदवार अशोक वाघमोडे यांचा अर्ज बाद झाला आहे.

Ashok Waghmode

Source : abp majha

Solapur MLC Election Ashok Waghmode Case : राजकीय वर्तुळात कधी कोणता धक्कादायक आणि अनाकलनीय प्रकार समोर येईल, याचा नेम नसतो. सध्या अत्यंत चुरशीच्या ठरणाऱ्या सोलापूर स्थानिक स्वराज्य संस्था मतदारसंघाच्या (Solapur Vidhan Parishad Election) विधान परिषद निवडणुकीत असाच एक खळबळजनक आणि गंभीर प्रकार उघडकीस आला. उमेदवारी अर्जावर चक्क सूचक आणि अनुमोदकांच्या बोगस सह्या करून अर्ज दाखल केल्याचा प्रकार छाननी प्रक्रियेत उघड झाला. या भयंकर गैरप्रकारामुळे निवडणूक निर्णय अधिकाऱ्यांनी संबंधित उमेदवाराचा अर्ज थेट बाद केला आहे. 'न्यू राष्ट्रीय समाज पार्टी'चे अधिकृत उमेदवार अशोक वाघमोडे यांच्यावर ही नामुष्की ओढावली असून, त्यांना निवडणुकीतून अपात्र ठरविण्यात आलं.

Solapur Bogus Signatures Exposed : 10 पैकी 5 सूचकांच्या बोगस सह्या

सोलापूर विधान परिषद निवडणुकीसाठी न्यू राष्ट्रीय समाज पार्टीच्या वतीने अशोक वाघमोडे यांनी आपला उमेदवारी अर्ज दाखल केला होता. नियमानुसार, या उमेदवारी अर्जासोबत सोलापूर जिल्ह्यातील विविध स्थानिक स्वराज्य संस्थांमधील 10 लोकप्रतिनिधींची नावं सूचक आणि अनुमोदक म्हणून जोडण्यात आली होती. मात्र, निवडणूक कार्यालयात अर्जांची छाननी सुरू असतानाच या प्रकरणाला अत्यंत नाट्यमय वळण मिळालं.

अर्जावर सूचक म्हणून ज्या 10 सदस्यांची नावे होती, त्यापैकी 5 सदस्यांनी थेट निवडणूक निर्णय अधिकारी यांच्यासमोर प्रत्यक्ष हजर राहून लेखी प्रतिज्ञापत्र (Affidavit) सादर केलं. आम्ही उमेदवार अशोक वाघमोडे नावाच्या कोणत्याही व्यक्तीला ओळखत नाही, तसेच या उमेदवारी अर्जावर असलेल्या सह्या आमच्या नाहीत, असा दावा त्यांनी निवडणूक अधिकाऱ्यांसमोर केला. 

संबंधित उमेदवाराने निवडणूक यंत्रणेची फसवणूक करण्यासाठी आपल्या बोगस आणि बनावट सह्या केल्याचा खळबळजनक दावा करत, हा अर्ज त्वरित बाद करण्यात यावा, अशी आग्रही मागणी या सदस्यांनी केली.

Collector Rejects Candidate Application : उमेदवारी अर्ज अवैध

सूचकांनी घेतलेले गंभीर आक्षेप, प्रत्यक्ष दिलेली साक्ष आणि सादर केलेली कायदेशीर प्रतिज्ञापत्रे लक्षात घेऊन सोलापूरचे जिल्हाधिकारी तथा निवडणूक निर्णय अधिकारी यांनी तात्काळ निर्णय घेतला. त्यांनी न्यू राष्ट्रीय समाज पार्टीचे उमेदवार अशोक वाघमोडे यांचा उमेदवारी अर्ज तांत्रिक आणि कायदेशीर निकषांवर पूर्णपणे अवैध ठरवत बाद (Rejected) केला. यामुळे वाघमोडे यांचा निवडणुकीच्या रिंगणात उतरण्यापूर्वीच पत्ता कट झाला आहे.

Corporators Demand Criminal Case : ...तर फौजदारी गुन्हा दाखल करा; नगरसेविका आक्रमक

निवडणूक लढवण्यासाठी थेट आपल्या नावाचा आणि स्वाक्षरीचा इतका मोठा गैरवापर झाल्याचे पाहून हरकत घेणाऱ्या नगरसेविका आणि इतर लोकप्रतिनिधी कमालीचे संतप्त झाले आहेत. लोकशाही आणि निवडणूक प्रक्रियेची थट्टा उडवणाऱ्या उमेदवार अशोक वाघमोडे यांच्याविरोधात तात्काळ फौजदारी गुन्हा (Criminal Case) दाखल करण्यात यावा आणि त्यांच्यावर कठोर कायदेशीर कारवाई करण्यात यावी, अशी जोरदार मागणी संबंधित नगरसेविकांनी प्रशासनाकडे केली. त्यामुळे आता या उमेदवारावर पोलीस काय कारवाई करणार, याकडे सर्वांचे लक्ष लागले आहे.

ही बातमी वाचा: