एक्स्प्लोर

Shivsena-BJP BMC Mayor: फडणवीस-शिंदेंची खेळी आणि मनसेचा पत्ता कट होणार; भाजप-शिंदेंच्या शिवसेनेत नेमकं काय घडतंय?, Inside Story

Shivsena-BJP BMC Mayor: मुंबई महापालिकेत स्वतंत्र गटनोंदणी करण्याचा शिंदेंच्या शिवसेनेचा प्रयत्न असल्याची माहिती याआधी हाती आली होती. त्यासाठी शिंदेसमर्थक नगरसेवक स्वतंत्रपणे कोकण भवनला नोंदणीसाठी जाणार होते.

By : सूरज सावंत | Edited By: मुकेश चव्हाण | Updated at : 28 Jan 2026 08:30 AM (IST)

Shivsena-BJP BMC Mayor

Source : ABP

Shivsena-BJP BMC Mayor: मुंबई महापालिकेच्या निवडणुकीत (Mumbai Municipal Corporation Election 2026) भाजप महायुतीला जनतेनं कौल दिला. पण भाजप आणि शिंदेंची शिवसेना यापैकी कोणत्याही एका पक्षाला बहुमताचा आकडा गाठता आलेला नाही. त्यानंतर आता भाजप आणि शिवसेनेनं (BJP-Shivsena Shinde Group) सत्तास्थापनेसाठी हालचाली सुरु केल्या आहेत. मुंबई महापालिकेत स्वतंत्र गटनोंदणी करण्याचा शिंदेंच्या शिवसेनेचा प्रयत्न असल्याची माहिती याआधी हाती आली होती. त्यासाठी शिंदेसमर्थक नगरसेवक स्वतंत्रपणे कोकण भवनला नोंदणीसाठी जाणार होते. पण अचानक त्यांनी नोंदणीसाठी जाणं टाळलं आणि त्यानंतर महायुतीच्या वतीनं दोन्ही पक्षांच्या नगरसेवकांच्या एकत्रित गटनोंदणीचा निर्णय झाल्याचं समोर आलं होतं. परंतु भाजपचा एकत्र गट स्थापन करण्याचा प्रस्ताव मात्र शिवसेनेने अद्याप मान्य केलेला नाही, अशी माहिती आली आहे. त्यामुळेच भाजप-शिवसेनेचा (Shivsena-BJP Alliance) मुंबई महानगरपालिकेतील तिढा सुटत नाही.

स्थायी समिती आणि सुधार समिती यात पक्षनिहाय संख्याबळानुसार भाजप–शिंदे सेना युतीकडे 13 सदस्य असून, ठाकरे सेना, काँग्रेस, मनसे आणि एआयएमआयएम मिळूनही 13 सदस्य आहेत. अशा स्थितीत अध्यक्षपद चिठ्ठीद्वारे ठरवले गेले, तर विरोधकांच्या बाजूने निकाल लागल्यास सत्ताधारी युतीस मोठा फटका बसू शकतो. ही नामुष्की टाळण्यासाठी भाजप आणि शिंदे सेनेने एकत्र नोंदणी केल्यास स्थायी समिती व सुधार समितीत भाजप व शिंदे सेनेच्या सदस्य संख्येत वाढ होत असल्याने मनसेचा सुधार समिती सदस्य पदातून पत्ता कट होणार आहे. (Shivsena-BJP Yuti)

महापौर, स्थायी समिती आणि सुधार समिती शिंदेंना देण्यास भाजप तयार नाही- (Eknath Shinde Devendra Fadnavis)

एकत्रित नोंदणी केल्यास दोन्ही समितीत महायुतीचे संख्याबळ अधिकचे असून भविष्यात कुठेलेही पालिकेतील निर्णय घ्यायचे झाल्यास ते बहुमताच्या जोरावर घेता येऊ शकतात. यामुळेच दोन्ही समितींच्यासाठी बहुमत स्वतःकडे ठेवण्यासाठी भाजपकडून शिवसेनेला एकत्रित नोंदणीची गळ घातली जात आहे. उद्भवलेल्या या राजकीय परिस्थितीचा फायदा घेण्यासाठी शिंदेंच्या सेनेकडूनही महापौर भाजपने घेतल्यास स्थायी समितीचे अध्यक्षपद मिळावे ही मागणी लावून धरली आहे. मात्र भाजप आणि शिवसेनेतील संख्याबळ लक्षात घेता भाजप महापौर, स्थायी समिती आणि सुधार समिती शिंदेंना देण्यास तयार नसल्याचे सूत्रांचे माहिती आहे.

राज्यातील हायकमांडकडून एकत्र गट नोंदणीसाठी गळ- (BJP-Shivsena Yuti Mumbai)

पडद्या आडून भविष्यात एखाद्या निर्णयावर शिंदेंच्या नगरसेवकांनी विरोध केल्यास संबंधित प्रकल्प किंवा निर्णयास बहुमत लक्षात घेऊन विरोध होऊ शकतो. हे टाळण्यासाठी एकत्रित येऊन गटस्थापन केल्यास पक्षाने बजावलेला व्हीप हा शिंदेंच्या नगरसेवकांनाही लागू राहील. त्यामुळे बहुमताच्या आधारावर भाजप शिवसेना एखादा निर्णय किंवा प्रकल्प मार्गी लावण्यास मदतही होईल आणि पुढील 5 वर्षे निश्चिंत राहता येईल. त्यामुळेच दोन वेळा गट नोंदणीसाठी निघालेल्या शिवसेना नगरसेवकांना भाजपच्या राज्यातील हायकमांडकडून एकत्र गट नोंदणीसाठी गळ घातली जात असल्याची माहिती सूत्रांनी दिली आहे.