Raj Thackeray MNS: राज ठाकरेंनी भाकरी फिरवली, मनसे पक्षसंघटनेत मोठे बदल, कोणाला कोणती जबाबदारी मिळाली?

maharashtra navnirman sena: मनसे पक्षसंघटनेत बदल करण्यात आले आहेत. मनसेत केंद्रीय समितीची स्थापना. शहराध्यक्ष पदाची निर्मिती. राज ठाकरे गुढीपाडव्याला काय बोलणार?

Raj Thackeray MnS

Source : ABPLIVE AI

मुंबई: आगामी मुंबई महानगरपालिका निवडणुकीच्या पार्श्वभूमीवर मनसेप्रमुख राज ठाकरे यांच्याकडून पक्षसंघटनेत अनेक बदल करण्यात आले आहेत. राज ठाकरे यांच्या उपस्थितीत रविवारी रवींद्र नाट्यमंदिरात मनसेची बैठक पार पडली. यावेळी राज ठाकरे (Raj Thackeray) यांनी मनसेतील नवीन पदे आणि पदाधिकाऱ्यांची घोषणा केली. त्यानुसार फक्त विभाग अध्यक्ष असलेल्या मनसेत (MNS) आता शहर अध्यक्ष आणि उप-शहर अध्यक्ष या नव्या पदांची निर्मिती करण्यात आली आहे. मुंबईच्या शहर अध्यक्षपदी संदीप देशपांडे यांची नियुक्ती करण्यात आली आहे. दक्षिण मुंबईच्या उपशहर अध्यक्षपदी यशवंत किल्लेदार तर मुंबई पश्चिम उपनगराची जबाबदारी कुणाल माईणकर आणि मुंबई पूर्व उपनगराची जबाबदारी योगेश सावंत यांच्याकडे देण्यात आली आहे. तर अमित ठाकरे यांच्याकडे मनसेच्या सर्व शाखाध्यक्षांची जबाबदारी सोपवण्यात आली आहे. याशिवाय, बाळा नांदगावकर, नितीन सरदेसाई, अविनाश अभ्यंकर यांच्यासह आणखी काही नेत्यांना मनसेच्या केंद्रीय समितीत स्थान देण्यात आले आहे. ही केंद्रीय समिती मनसेतील सर्व पदाधिकाऱ्यांच्या कारभारावर देखरेख ठेवेल, असे राज ठाकरे यांनी सांगितले. 

केंद्रीय समिती ही सर्व विभाग अध्यक्षांवर लक्ष ठेवेल. बाळा नांदगावकर आणि अविनाश अभ्यंकर यांच्याकडे मनसेच्या केंद्रीय समितीची विशेष जबाबदारी असेल. मुंबईच्या विभाग अध्यक्ष यांच्यावर नियंत्रण ठेवण्यासाठी नितीन सरदेसाई यांच्यावर  विशेष जबाबदारी असेल.

मनसेत 20 ते 25 हजार गटाध्यक्षांची संख्या

काय करायचं, कसं करायचं त्याची आखणी 2 एप्रिल पर्यंत सर्वांना मिळेल. शहर रचनेत कामांची रचना आहे काय करायचं आणि काय नाही करायचं, हे सांगितले जाईल, असे राज ठाकरे यांनी सांगितले. ज्याला जे काम दिलं तेच करायचं. त्यामुळे भांडणं कमी होतील, अशा सूचना राज ठाकरे यांनी पदाधिकाऱ्यांना दिल्या. अनेक गोष्टी साचल्या आहेत. ते सर्व गुढीपाडवा मेळाव्यात बोलेन, असे राज ठाकरे यांनी सांगितले.

ठाण्यात मनसेची जबाबदारी कोणाकडे ?

ठाण्यात विभाग अध्यक्षांसाठी प्रकाश भोईर व राजु पाटील व अन्य महत्त्वाचे नेते असतील. ठाणे महापालिकांतील उपविभाग अध्यक्षांसाठी पुष्कर विचारे, गजानन काळे व अन्य पदाधिकारी समन्वयक असतील. तर अविनाश जाधव हे शाखाध्यक्षांसाठी निरीक्षक म्हणून काम करतील.

मनसेचा गुढीपाडवा मेळावा शिवाजी पार्कवर

मनसेचा गुढीपाडवा मेळावा 30 मार्चला होणार आहे. मुंबईतील शिवाजी पार्कवर हा मेळावा होईल. या मेळाव्यात राज ठाकरे काय बोलणार, याची उत्सुकता सर्वांना लागली आहे.

आणखी वाचा