Mumbai: आता पुन्हा MSRTC चं अध्यक्षपद प्रताप सरनाईकांकडेच, रात्री उशीरा मुख्यमंत्र्यांच्या नियुक्तीपत्रकावर सह्या
काही दिवसांपूर्वी मुख्यमंत्र्यांनी IAS अधिकारी संजय सेठी यांची MSRTC च्या अध्यक्षपदी नियुक्ती केल्याने देवेंद्र फडणवीस आणि एकनाथ शिंदेंमध्ये दुरावा निर्माण झाल्याची चर्चा होती.
Mumbai: काही दिवसांपूर्वीच मुख्यमंत्री देवेंद्र फडणवीस यांनी शिंदे गटाला मोठा धक्का देत एमएसआरटीसी च्या अध्यक्षपदावर IAS अधिकारी संजय सेठी यांची नियुक्ती केली होती. बुधवारी (6 फेब्रुवारी) तसे राजपत्र जारी करून निर्णय जाहीर केला होता. पण रात्रीतून सूत्र फिरली आणि MSRTCचं अध्यक्षपद पुन्हा एकदा परिवहनमंत्री प्रताप सरनाईकांकडे आलं आहे. सरनाईकांच्या नियुक्ती पत्रावर रात्री उशिरा मुख्यमंत्र्यांनी सही केल्याची माहिती समोर आली आहे. त्यामुळे आता मुख्यमंत्री देवेंद्र फडणवीस (Devendra Fadnavis) आणि एकनाथ शिंदे मधला दुरावा दूर झाल्याची चर्चा राजकीय वर्तुळात रंगलीय. (Pratap Sarnaik)
MSRTC चे अध्यक्ष पद पुन्हा एकदा प्रताप सरनाईकांकडे
2014 पासून एसटी महामंडळाचे अध्यक्षपद परिवहन मंत्र्यांकडेच होते. मात्र विधानसभा निवडणुकांच्या तोंडावर शिंदे गटातील मंत्रिपदाची नाराजी दूर करण्यासाठी एसटी महामंडळाचे अध्यक्ष भरत गोगावले यांना देण्याचा निर्णय घेतला होता. दरम्यान भरत गोगावल्यांकडे सध्या रोजगार हमी विभागाचे मंत्रीपद आलय त्यामुळे एसटी महामंडळाचा अध्यक्ष पद शिंदे गटाच्या प्रताप सरनाईकांना देण्यात आलं. मात्र दोन दिवसांपूर्वी मुख्यमंत्र्यांनी प्रताप सरनाईकांना धक्का देत MSRTC च्या अध्यक्षपदी आयएएस अधिकारी संजय सेठी यांची नेमणूक केली होती. मात्र आता रात्रीतून प्रताप सरनाईकांच्या एमएसआरटीसी च्या अध्यक्षपदाच्या नियुक्ती पत्रावर मुख्यमंत्री देवेंद्र फडणवीस यांनी सह्या केल्याची माहिती आहे. त्यामुळे MSRTC चे अध्यक्ष पद पुन्हा एकदा प्रताप सरनाईकांकडे आले आहे.
एसटी भाडेवाढ, जुन्या बसचा प्रश्न
सार्वजनिक वाहतुकीसाठी राज्यातील लाखो नागरिक एसटी बस मधून प्रवास करतात. मात्र अलीकडे MSRTC ला वाढत्या तोट्याचा जुन्या बसचा तसेच कर्मचारी संप आणि कमी होत चाललेल्या प्रवासी संख्येचा सामना करावा लागतोय. दररोजचे आर्थिक नुकसान कमी करण्यासाठी महामंडळाने गेल्या महिन्यात 15 टक्के भाडेवाढही लागू केली होती. तसेच पुण्यातील स्वारगेट अत्याचार प्रकरणानंतर राज्यातील बस स्थानकातील जुन्या बसेस संदर्भात तसेच महिला सुरक्षेचा प्रश्न ऐरणीवर आलाय. बसस्थानक परिसरातील निर्लेखित केलेल्या जुन्या बसेसची ताबडतोब विल्हेवाट लावणे आवश्यक आहे. कारण, या बसेसकडे दुर्लक्ष होत असल्याने याच बसेस एकप्रकारे अवैध धंद्याचे अड्डे बनत आहेत, आणि त्यातूनच अशा घटनांना प्रोत्साहन मिळते. त्यामुळे भविष्यात कोणत्याही बसस्थानक परिसरात अशा प्रकारच्या निर्लेखित केलेल्या बसेस उभ्या करण्यात येऊ नयेत, असे निर्देशही यावेळी परिवहन मंत्री प्रताप सरनाईक यांनी दिले आहेत.
हेही वाचा:
महत्त्वाच्या बातम्या
