चद्दर लगी फटने, खैरात लगी बटने! विधानभवनाच्या पायऱ्यांवर जोरदार घोषणाबाजी, सताधारी-विरोधकांमध्ये जुगलबंदी
Maharashtra Monsoon Session 2024 : विधानभवनाच्या पायऱ्यांवर विरोधक आणि सत्ताधाऱ्यांमध्ये चांगलीच जुंपल्याचे दिसून आले. चद्दर लगी फटने, खैरात लगी बटने, अशा घोषणा विरोधकांनी दिल्या.
Monsoon Session 2024 : आज विधिमंडळाचा पावसाळी अधिवेशनाचा (Maharashtra Monsoon Session 2024) तिसरा दिवस आहे. काल (दि. 29) अर्थमंत्री अजित पवार (Ajit Pawar) यांनी राज्याचा अंतरिम अर्थसंकल्प (Budget 2024) सादर केला. विधानसभा निवडणुका अवघ्या काही महिन्यांवर येऊन ठेपल्याने या अर्थसंकल्पात घोषणांचा पाऊस पडला. विरोधकांनी अर्थासंकल्पावरून सत्ताधाऱ्यांवर जोरदार हल्लाबोल केला. तर सत्ताधाऱ्यांकडूनही विरोधकांना चोख प्रत्युत्तर देण्यात आले. तर आज तिसऱ्या दिवशी कामकाज सुरु होण्यापूर्वी विधानभवनाच्या पायऱ्यांवर विरोधक आणि सत्ताधाऱ्यांमध्ये चांगलीच जुंपल्याचे दिसून आले.
सुरुवातीला सत्ताधारी पक्षांकडून विधानभवनाच्या पायऱ्यांवर आंदोलन करण्यात आले. किस्सा कुर्सी का? असे म्हणत शिवसेना ठाकरे गटाचे पक्ष प्रमुख उद्धव ठाकरे (Uddhav Thackeray) यांच्यावर व्यंगचित्रातून टीका करण्यात आली. एक आघाडी बारा भानगडी, गांव बसा नही लुटेरे आ गए, अशा जोरदार घोषणा सत्ताधाऱ्यांकडून देण्यात आला. यावेळी ठाकरे गटाचे नेते (Bhaskar Jadhav) आणि शिंदे गटाचे नेते भरत गोगावले (Bharat Gogawale) यांच्यात जुगलबंदी पाहायला मिळाली.
भास्कर जाधवांची भरत गोगावलेंवर टीका
यानंतर भास्कर जाधव यांनी माध्यमांशी बोलताना भरत गोगावले खरपूस समाचार घेतला. महायुतीत बारा भानगडी आहेत. हे गोगावले पायऱ्यांवर उभे राहून सांगत आहेत. त्यामुळे उद्धव ठाकरे सीएम पदी योग्य होते. हे सांगण्याचा प्रयत्न गोगावले करत आहेत, अशी टीका भास्कर जाधव यांनी केली.
चद्दर लगी फटने, खैरात लगी बटने
यानंतर विरोधकांनी पायऱ्यांवर आंदोलनाला सुरूवात केली. चद्दर लगी फटने, खैरात लगी बटने, अशा घोषणा विरोधकांकडून देण्यात आल्या. यावेळी विरोधकांच्या हातात विविध पोस्टर दिसून आले. तिजोरीत खळखळाट अन् थापांचा सुळसुळाट. प्रत्यक्षात निधींची वानवा, वरून खैरातीचा गारवा. खिशात नाही आणा, मला बाजीराव म्हणा, अशा घोषणांनी विरोधकांनी विधानभवन परिसर दणाणून सोडला. आंदोलनावेळी जितेंद्र आव्हाड यांच्या हातात विठ्ठल रुखुमाईची मूर्ती होती.
विरोधक सत्ताधाऱ्यांना घेरण्याच्या तयारीत
विरोधकांकडून आज विधानसभेत नागपूर-अमरावती महामार्गावरील चामुंडी ब्लास्टचा मुद्दा मांडला जाणार आहे. चामुंडी एक्सप्लोझिव्ह प्रायव्हेट मिलिटेड कंपनीविरोधात सदोष मनुष्यवधाचा गुन्हा दाखल करण्याची मागणी विरोधी पक्षनेते विजय वडेटीवार हे लक्षवेधीत मांडणार आहेत. या ठिकाणी सातत्याने स्फोट होत असतानाही सरकारने कुठल्याही प्रकारची कारवाई न केल्याचा आरोप करण्यात आला आहे. दुसरीकडे विधानपरिषदेत सतेज पाटील आणि काँग्रेस नेत्यांकडून शक्तिपीठ महामार्गाचा मुद्दा मांडला जाणार आहे. त्यामुळे आज विरोधक सत्ताधाऱ्यांना घेरण्याच्या तयारीत असल्याचे दिसून येत आहे.
महत्त्वाच्या बातम्या
ट्रेंडिंग न्यूज
