सांगली : भाजप आमदार गोपीचंद पडळकर (Gopichand padalkar) यांनी राष्ट्रवादीचे ज्येष्ठ नेते जयंत पाटील यांच्याबद्दल आणि त्याच्या वडिलांबद्दल अपशब्द वापरले होते. सोशल मीडियावर पडळकर यांचा व्हिडिओ व्हायरल झाल्यानंतर चोहोबाजुंनी त्यांच्यावर टीकेची झोड उठली. जयंत पाटलांनी कुठलीही प्रतिक्रिया दिली नाही, पण राष्ट्रवादी काँग्रेस चांगलीच आक्रमक झाल्याचं दिसून आला. त्याच पार्श्वभूमीवर आज राष्ट्रवादी काँग्रेसच्यावतीने सांगलीत (Sangli) आज संस्कृती बचाव मोर्चाचे आयोजन करण्यात आले होते. या मोर्चात सहभागी झालेल्या आमदार जितेंद्र आव्हाड (Jitendra Awhad) यांनी गोपीचंद पडळकरांना पुन्हा इशारा दिला आहे. यापूर्वीही, त्यांनी मंगळसूत्र चोराचा.. अशी घोषणाबाजी विधिमंडळ परिसरात केली होती.
विधिमंडळात मंगळसूत्र चोर म्हणून मी का ओरडलो, याबाबतचा खुलासा आमदार जितेंद्र आव्हाड यांनी सांगलीत माध्यमांशी बोलताना केला. मी विधीमंडळात आल्यानंतर पडळकर यांनी, हा बघा आला लांड्याचा, असा शब्द उच्चार माझ्याबाबत केला. म्हणून मी त्या दिवशी जे बोलायचं ते बोललो आणि त्यानंतर त्यांनी माझ्यावर गाडी घालण्याचा प्रयत्न केला. मात्र, या घटनेत दिवंगत सरपंच संतोष देशमुख यांच्या भावाला ती गाडी लागली असा किस्सा आव्हाड यांनी सांगितला. तसेच, जयंत पाटील गप्प बसले असतील पण मी गप्प बसणार नाही, असा इशाराही जितेंद्र आव्हाड यांनी गोपीचंद पडळकर यांना दिला आहे.
जितेंद्र आव्हाड यांनी गोपीचंद पडळकरांना हात जोडत एक सल्लाही दिला आहे. असेच बोलत राहा, आपल्या ओरिजनल संस्कृतीची महाराष्ट्राला ओळख करून द्या, आपण कसे आहोत हे महाराष्ट्राला कळलं पाहिजे. आपण ओरिजनल कसे आहोत हे सर्वांना समजू द्या , असा खोचक टोलाच आमदार जितेंद्र आव्हाड यांची पडळकर आणि भाजप नेत्यांना लगावला.
कुटुंबीयांच्या जखमेवर मीठ चोळण्याचा प्रकार
दरम्यान, भारत आणि पाकिस्तान यांच्यातील सामन्यादरम्यान पाकिस्तानच्या फलंदाजाने बंदुकीच्या गोळीच्या स्टाईलने सेलिब्रेशन केले होते. त्या क्रिकेटपटूच्या कृतीकरून आमदार जितेंद्र आव्हाड यांनी मोदी सरकारवर टीका केली. खेळवा मॅच अजून, दहशतवाद्याकडून मारले गेलेल्यांच्या कुटुंबीयांच्या जखमेवर मीठ चोळण्याचा हा प्रकार आहे, असेही आव्हाड यांनी म्हटले.
हेही वाचा
Raj Thackeray: विधानसभेला दंड थोपटले; पण राज ठाकरे समोर येताच 70 वर्षीय सदा सरवणकरांनी पाय धरले