बुलढाणा : शरद पवार गटाच्या राष्ट्रवादी काँग्रेस पक्षाचे नुकतेच चिंतन शिबिर झालं. यात खासदार सुप्रिया सुळे (Supriya Sule) यांनी देशात आर्थिक मागासलेपणावर आरक्षण असावं, याचं समर्थन केलं. यावर ऑल इंडिया पॅंथर सेनेचे राष्ट्रीय अध्यक्ष दीपक केदार (Deepak Kedar) यांनी आक्रमक पवित्रा घेत सुप्रिया सुळे यांचे नाव न घेता टीका केली आहे. तसेच त्यांनी माफी मागावी आणि सामाजिक मागासलेपणावरच आरक्षणाची बाजू लावून धरावी, अन्यथा आम्ही रस्त्यावर उतरू अशी भूमिका घेतली आहे. सोन्याचा चमचा घेऊन जन्माला आलेल्या ताईंना सामाजिक मागासलेपण काय कळणार? असे म्हणत दीपक केदारांनी नाव न घेता सुप्रिया सुळेंवर टीका केली आहे.
आर्थिक निकषावरील आरक्षण ही संघ, भाजपची भाषा - दीपक केदार
आरक्षणाविरोधी ताई सोन्या-चांदीचा चमचा तोंडांत घेऊन जन्माला आलात, तुम्हाला काय कळणार दलित, आदिवासी घटकांचे सामाजिक मागासलेपण? फुले, शाहू, डॉ. बाबासाहेबांच्या महाराष्ट्रात आरक्षण नाकारणाऱ्या प्रवृत्ती जन्माला आल्या याची आम्हाला लाज का वाटू नये! आम्ही काहीही सहन करू, पण आरक्षण नाकारणारे सहन करणार नाहीत. आर्थिक निकषावरील आरक्षण ही संघ, भाजपची भाषा आहे. आता एक करा तुमचा पक्ष भाजपात विलीन करा. असेही दीपक केदार म्हणाले. आरक्षणवादी आमदार जितेंद्र आव्हाड यांची भूमिका हाताची घडी तोंडावर बोट का? गुलामी सोडा आणि बोला हे आर्थिक निकषावरील आरक्षणाची व्याख्या त्यांना मान्य आहे का? असेही ते म्हणाले. कंगना राणौत सारखं वागावं हे दुर्दैव आहे. बापाच्या घराणेशाही आरक्षण हे अस्तित्व असणारे काय बोलताय? बिहार निवडणुकीत मनुवादी बी टीम म्हणून काम करताय का? असा सवाल ही दीपक केदारांनी यावेळी बोलताना केला आहे.
माफी मागा अन्यथा आम्ही रस्त्यावर उतरू- दीपक केदार
मराठा आरक्षणाची चर्चा सुरू आहे. म्हणून आरक्षणच नाकारताय? हे योग्य नाही. पुरोगामी विचारधारेचे मनुवादी विचारसरणीचे झालेत. माफी मागा अन्यथा आम्ही रस्त्यावर उतरू. असा इशारा ऑल इंडिया पँथर सेना दीपक केदार यांनी सुप्रिया सुळे यांना दिला आहे.
आणखी वाचा