बृजभूषण सिंहांवर लैंगिक शोषणाचे आरोप, मनसेची पहिली प्रतिक्रिया

भारतीय कुस्ती महासंघाचे अध्यक्ष बृजभूषण सिंह यांच्यावर महिला पैलवानांनी लैंगिक शोषणाचे आरोप केले आहेत. त्यानंतर आता राज ठाकरे यांच्या मनसेची पहिली प्रतिक्रिया समोर आली आहे.

Prakash Mahajan

Aurangabad News : भारतीय कुस्ती महासंघाचे अध्यक्ष बृजभूषण सिंह (Brij Bhushan Singh) यांच्यावर महिला पैलवानांनी लैंगिक शोषणाचे आरोप केले आहेत. त्यानंतर आता राज ठाकरे (Raj Thackeray) यांच्या मनसेची पहिली प्रतिक्रिया समोर आली आहे. गुंड प्रवृत्तीच्या बृजभूषण सिंहांची हकालपट्टी करा, अशी पहिली मागणी मनसे नेते प्रकाश महाजन (Prakash Mahajan) यांनी केली. ते एबीपी माझाशी बोलत होते. तसंच भाजपच्या महिला आघाडीने यावर आपलं मत मांडलं पाहिजे, अशी मागणीही मनसेने केली.  

अयोध्या दौऱ्यासाठी निघालेल्या राज ठाकरे यांना बृजभूषण सिंह यांनी रोखलं होतं. उत्तर भारतीयांची माफी मागा मगच अयोध्येत पाय ठेवा अशी आक्रमक भूमिका बृजभूषण यांनी घेतली होती. त्यानंतर बृजभूषण हे महाराष्ट्र केसरी स्पर्धेसाठी पुण्यात आले  होते. त्यावेळी मात्र मनसेने विरोध केला नव्हता. आता मात्र मनसेने आक्रमक भूमिका घेतली.

बृजभूषण सिंहांची हकालपट्टी करा 

प्रकाश महाजन म्हणाले, "बृजभूषण यांची कुस्तीगीर परिषदेवरून हकालपट्टी करा. हा माणूस गुंड प्रवृत्तीचा. तो स्त्रियांच्या बाबतीत कसा आहे समोर आलं आहे. त्याने कुस्तीगीरसंघाचा राजीनामा दिला पाहिजे"

पवारांनी भूमिका स्पष्ट करावी

दरम्यान, गुंड प्रवृत्तीच्या बृजभूषण सिंहांबाबत राष्ट्रवादी काँग्रेसचे अध्यक्ष शरद पवार यांनी आपली भूमिका मांडावी, असंही प्रकाश महाजन म्हणाले. "बृजभूषणबाबत पवार यांचं काय म्हणणं आहे? सुप्रिया सुळे यांचं काय म्हणणं आहे. संजय राऊतांचं काय म्हणणं आहे? असा सवालही प्रकाश महाजन यांनी केला. 

महिला पैलवानांच्या आरोपात तथ्य

जंतर-मंतरवर बसून महिला पैलवानांनी लैंगिक शोषणाचा आरोप केलाय यात कुठेना कुठेतरी तथ्य आहे. अशा माणसामुळे राज ठाकरे यांना आयोध्याला जाण्यापासून रोखण्यात आलं. यावर भाजपाचा काय मत आहे? पंतप्रधान मुंबईत आहेत त्यांनी त्यांचं म्हणणं सांगावं.  अशा प्रवृत्तीचा लोक भाजपकडे असतील तर 2024 काय होईल?. भारतीय जनता पक्षातील महिलांचं काय मत आहे. 300 पार मुळे कारवाई होणार नाही. भाजपच्या महिला आघाडीने यावर आपलं मत मांडलं पाहिजे, अशी मागणी प्रकाश महाजन यांनी केली.

VIDEO : Prakash Mahajan on Brij Bhushan Singh : गुंड प्रवृत्तीच्या बृजभूषण सिंहांची हकालपट्टी करा

हेही पाहा