एक्स्प्लोर

BMC Election 2026: रामदास आठवलेंनी मुंबईत 39 उमेदवार उतरवताच भाजप-शिंदे गटाचा मोठा निर्णय, रिपाइंला किती जागा सोडल्या?

BMC Election 2026: मुंबईत भाजप आणि शिवसेना युतीत केंद्रीय राज्यमंत्री रामदास आठवले यांच्या रिपाइं पक्षाची देखील एन्ट्री झाली आहे.

By : सुरज सावंत | Updated at : 01 Jan 2026 10:21 AM (IST)

BMC Election 2026

Source : ABP Majha

BMC Election 2026: मुंबईत भाजप आणि शिवसेना युतीत (BJP and Shiv Sena Alliance) केंद्रीय राज्यमंत्री रामदास आठवले (Ramdas Athawale) यांच्या रिपाइंची (RPI) देखील एन्ट्री झाली आहे. भाजप आणि शिवसेना रिपाइंसाठी प्रत्येकी सहा-सहा जागा सोडणार असल्याची माहिती मिळत आहे. रामदास आठवले यांनी मुख्यमंत्री देवेंद्र फडणवीस (Devendra Fadnavis) आणि उपमुख्यमंत्री एकनाथ शिंदे (Eknath Shinde) यांची भेट घेतल्यानंतर ही माहिती समोर येत आहे. मुंबईमध्ये भाजप 137 तर एकनाथ शिंदे यांची शिवसेना 90 जागांवर लढत आहे. दोन जागांवर एबी फॉर्मचा घोळ झाल्याने तिथे युतीचा एकही उमेदवार नाही. रामदास आठवले यांच्या रिपाइंची युतीत एन्ट्री झाल्यानंतर भाजपा 131, शिवसेना 84 आणि रिपाइं 12 असे जागा वाटपाचे गणित असणार आहे.

मुंबईत महायुतीत शिवसेना आणि भाजपा या दोन पक्षाचेच जागावाटप झाले होते. या जागा वाटपात रिपाइंला स्थान न दिल्याने रामदास आठवले नाराज झाले होते. नाराज रामदास आठवले यांनी वर्षा बंगल्यावर जात मुख्यमंत्री देवेंद्र फडणवीस यांची भेट घेतली. त्यानंतर ठाण्यात उपमुख्यमंत्री एकनाथ शिंदे यांची देखील भेट घेतली. या भेटीच्या पार्श्वभूमीवर दोन्ही पक्ष रिपाइंसाठी सहा-सहा जागा देणार असल्याचे आश्वासन देण्यात आल्याची माहिती रामदास आठवले यांनीच दिली आहे.

BMC Election 2026: उर्वरित जागा रिपाइं अपक्ष लढवणार

रामदास आठवले यांच्या रिपाइं पक्षाने जवळपास 39 उमेदवारी अर्ज मुंबईतून दाखल केलेले आहेत. त्यामुळे या 12 जागा जर रामदास आठवले यांच्या पक्षासाठी सुटल्या तर उर्वरित जागा रिपाइं अपक्ष म्हणून स्वबळावर लढवणार असल्याचे देखील समजते. आता नक्की या जागा वाटपाबाबत काय निर्णय होणार याबाबत उद्यापर्यंत स्पष्टता येणार आहे.