वाळूच्या गाडीला मिनीट्रॅव्हल्सची धडक, 10 जणांचा मृत्यू, 11 जखमी

मिनीट्रॅव्हल आणि वाळूची गाडी यांच्यात धडक होऊन 10 जणांचा मृत्यू झाला. तर 11 जण जखमी आहेत.

नाशिक: मुंबई-आग्रा महामार्गावर सोग्रसजवळ आज पहाटे भीषण अपघात झाला. मिनीट्रॅव्हल आणि वाळूची गाडी यांच्यात धडक होऊन 10 जणांचा मृत्यू झाला. तर  11 जण जखमी आहेत. वाळूच्या ट्रकमध्ये बिघाड झाल्याने तो रस्त्यात उभा होता. त्यावेळी भरधाव येणारी मिनीट्रॅव्हल तिच्यावर जाऊन आदळली.  हा अपघात इतका भीषण होता की, 6 जणांचा जागीच मृत्यू झाला. तर 15 जण जखमी झाले. दरम्यान, सर्व जखमींना तातडीने चांदवडच्या उपजिल्हा रुग्णालयात उपचारासाठी दाखल करण्यात आले.  उपचारादरम्यान चौघांचा मृत्यू झाल्याने मृतांचा आकडा 10 वर पोहोचला. मिनीट्रॅव्हल्समधील सर्व जण हे नाशिक,कल्याण,उल्हासनगर येथील असल्याचं सांगण्यात येत आहे. ते सर्व मध्यप्रदेशातील महाकालेश्वर,उज्जैन येथून देवदर्शन करुन परत येत असताना आज सकाळी हा अपघात झाला. या मिनीट्रॅव्हल्समध्ये एकूण 23 जण होते.