Nashik News : नाशिकचे नवे मनपा आयुक्त आणि जिल्हाधिकारी भाजपच्या मर्जीतले की शिवसेनेच्या? आजी-माजी पालकमंत्र्यांमध्ये रंगले शीतयुद्ध
Nashik News : मर्जीतील अधिकारी आणण्यावरुन शिवसेना आणि भाजपमध्ये वाद सुरु असल्याने नवे महापालिका आयुक्त मिळत नाहीत तर जिल्हाधिकाऱ्यांची देखील बदली होत नसल्याची अशी चर्चा नाशिकमध्ये दबक्या आवाजात सुरु आहे.
Nashik News : नाशिक महापालिका आयुक्त डॉ. चंद्रकांत पुलकुंडवार (Dr. Chandrakant Pulkundwar) यांची काही दिवसांपूर्वीच साखर आयुक्त (Sugar Commissioner) म्हणून बदली झाल्याने महापालिका आयुक्त (Municipal Corporation Commissioner) पद हे सध्या रिक्त आहे. तर नाशिकचे जिल्हाधिकारी गंगाथरण डी यांनी देखील जवळपास महिनाभरापूर्वी बदलीसाठी शासनाकडे विनंती केली आहे. मात्र मर्जीतील अधिकारी आणण्यावरुन शिवसेना (Shiv Sena) आणि भाजपमध्ये (BJP) वाद सुरु असल्याने नवे महापालिका आयुक्त मिळत नाहीत तर जिल्हाधिकाऱ्यांची देखील बदली होत नसल्याची अशी चर्चा नाशिकमध्ये (Nashik) दबक्या आवाजात सुरु आहे.
नाशिकच्या आजी-माजी पालकमंत्र्यांमध्ये शीतयुद्ध
आता या मुद्द्यावरुन शिवसेना आणि भाजपच्या आजी माजी पालकमंत्र्यांमध्ये गेल्या काही दिवसांपासून सुरु असलेलं शीतयुद्ध आता समोर आलं आहे.अधिकाऱ्यांच्या बदल्या दोन-तीन दिवसांमध्ये होतील, असं नाशिकचे माजी पालकमंत्री तथा भाजप नेते गिरीश महाजन यांनी रविवारी (18 जून) स्पष्ट केलं होत. "दोन-तीन दिवसांमध्ये नवे आयुक्त आणि जिल्हाधिकारी नाशिकमध्ये येतील तो निर्णय झाला आहे. एक-दोन दिवसात फाईलवर सह्या होतील आणि मुख्यमंत्री निर्णय घेतील, असं गिरीश महाजन म्हणाले होते.
तर विद्यमान पालकमंत्री शिवसेना नेते दादा भुसे यांनी यावरुन कुठलाही वाद नसल्याचं सांगितलं. भाजप आणि आम्ही हातात हात घालून काम करतोय. अधिकाऱ्यांच्या बदल्या हा प्रशासकीय भाग असून मुख्यमंत्री आणि उपमुख्यमंत्री निर्णय घेतील, असं दादा भुसे म्हणाले.
नाशिकला नवे जिल्हाधिकारी आणि मनपा आयुक्त कधी मिळणार?
त्यामुळे आता अधिकाऱ्यांच्या बदल्या नक्की कोणामुळे रखडल्या ? नाशिकला नवे महापालिका आयुक्त आणि जिल्हाधिकारी नक्की कधी भेटणार ? आणि ते कोणाच्या मर्जीतील असतील ? हे बघणं महत्त्वाचं ठरणार आहे.
राज्यातील सनदी अधिकाऱ्यांच्या बदल्या
राज्यातील सनदी अधिकाऱ्यांच्या 2 जून रोजी बदल्या करण्यात आल्या होत्या. 20 आयएएस अधिकाऱ्यांच्या बदल्यांचे आदेश जारी करण्यात आले होते. नाशिक महापालिका आयुक्त डॉ. चंद्रकांत पुलकुंडवार यांची बदली करण्यात आली. त्यांच्याकडे साखर आयुक्त म्हणून नवीन जबाबदारी देण्यात आली. संजीव जयस्वाल यांची म्हाडाचे उपाध्यक्ष व मुख्य कार्यकारी अधिकारी पदी बदली झाली आहे. मात्र, जयस्वाल यांच्याकडे पाणी पुरवठा व स्वच्छता विभागाचे प्रधान सचिव पदाचा पदभार देखील कायम राहिला आहे. तर तुकाराम मुंढे यांची पुन्हा एकदा बदली करण्यात आली. त्यांच्याकडे मराठी भाषा विभाग सोपवण्यात आला आहे.
हेही वाचा
महत्त्वाच्या बातम्या
