Nashik Hindu Morcha : 35 गुण जुळतील म्हणून ती त्याच्यासोबत गेली, पण... नाशिकमध्ये हजारोंचा विराट मूक मोर्चा

Nashik Hindu Morcha : आपल्या आयुष्यात एखादा आफताब येऊन आपली श्रद्धा होईल एवढं प्रेमाच्या आहारी जाण योग्य नाही.

Nashik Hindu Morcha

Nashik Hindu Morcha : नाशिकमध्ये आज लव्ह जिहादविरोधात हिंदू संघटनाकडून विराट मूक मोर्चा काढण्यात आला असून धर्मातर बंदी कायदा राज्यासह देशभरात लागू करावा अशी मागणी हिंदू संघटनाकडून करण्यात आली आहे. तसंच श्रध्दा वालकर हत्याप्रकरणी आफताबला फासावर लटकवण्याची, गोवंश हत्या बंदी कायद्याची कठोर अंमलबजावणी करण्याची आणि शिवरायांचा अपमान करणाऱ्या व्यक्तीवर आणि पक्षावर कारवाई करण्याची मागणी या संघटनेने केली आहे.

दिल्लीतील श्रद्धा वालकर हत्याकांड प्रकरणानंतर देशभरात संतापाची लाट उसळली आहे. राजकीय पक्ष, संघटनाकडून निषेध व्यक्त करण्यात येत आहे. याच पार्श्वभूमीवर नाशिकमध्ये सकल हिंदू समाजाकडून विराट मूक मोर्चाचे आयोजन करण्यात आले आहे. आज सकाळी शहरातील बी डी भालेकर मैदानातून हजारोंच्या संख्येने जमलेला जन समुदायाच्या माध्यमातून मोर्चाला सुरवात झाली आहे. बि.डी.भालेकर स्कुल मैदान, शालीमार चौक, सारडा कन्या विद्यालय, गाडगे महाराज पुतळा, रवीवार कारंजा, यशंवत व्यायाम शाळा, मेहेर सिग्नल, शिवतीर्थावर या मोर्चाचा समारोप होणार आहे. सद्यस्थितीत बीडी भालेकर मैदानावर प्रचंड गर्दी झाली असून मोर्चाला सुरवात झाली आहे. 

आफताबने दिल्ली येथे श्रद्धा वालकर हीचे 35 तुकडे करत निर्घुणपणे हत्या केली. या घटनेने युवतींमध्ये दहशत निर्माण झाली आहे. दिल्लीच नव्हे तर राज्यात लव्ह जिहादची समस्या गंभीर रूप धारण करीत आहे. त्यामुळे देशात लव्ह जिहाद विरोधी कायदा तसेच धर्मांतर विरोधी कायदा लागू करावा या मागणीसाठी सकल हिंदू समाजाने आक्रमक पवित्रा घेतला आहे. बीडी भालेकर मैदानात प्रचंड संख्येने महिलांसह पदाधिकारी मोर्चाचं सहभागी झाले असून जोरदार घोषणाबाजी देखील करण्यात येत आहे. यामध्ये '36 गुण जुळतील म्हणून ती त्याच्यासोबत गेली, पण जाता जाता स्वतःच्या आयुष्याचे 36 तुकडे करून गेली, आपल्या आयुष्यात एखादा आफताब येऊन आपली श्रद्धा होईल एवढं प्रेमाच्या आहारी जाण योग्य नाही', अशा आशयाचे फलक महिलांच्या हातात दिसत आहेत. विराट हिंदू मूक मोर्चाच्या माध्यमातून लव्ह जिहाद विरोधी कायदा तात्काळ करावा तसेच धर्मांतर विरोधी कायदा लागू करावा, दिल्ली सारखी घटना रोखण्यासाठी केंद्र व राज्य सरकारने पुढाकार घ्यावा, छत्रपती शिवाजी महाराजांचा अवमान करणाऱ्या प्रत्येक व्यक्तीवर, संघटनेवर, राजकीय पक्षावर कारवाई करण्यात यावी अशा आशयाच्या मागण्या सकल हिंदू समाजाच्या वतीने या मोर्चादरम्यान करण्यात आल्या आहेत.

मोर्चा मार्गात पोलिसांचा बंदोबस्त 
दरम्यान जिल्हा निहाय मोर्चा निघत असून बिडी भालेकर मैदानापासून हा मोर्चा जिल्हाधिकारी कार्यालयावर धडकणार आहे. यामध्ये शहरासह जिल्हाभरातील हिंदुत्ववादी संघटनांनी सहभाग घेतला असून जिल्हाधिकाऱ्यांना निवेदन देण्यात येणार आहे. यासाठी मोर्चात विविध संघटनांचे पदाधिकारी व नागरिक सहभाग असल्याने शहर पोलिसांचा बंदोबस्त तैनात करण्यात आला आहे. त्यानुसार शहरातील मोर्चा मार्गावर ठिकठिकाणी पोलीस बंदोबस्त तैनात करण्यात आला आहे.