नागपुरात त्रिपुरातील महिला प्रवाशावर बलात्कार

गणेशपेठ पोलीस स्टेशनमध्ये याप्रकरणी बलात्काराचा गुन्हा दाखल करण्यात आला असून पोलीस आरोपीचा शोध घेत आहेत. दरम्यान, पीडित महिला त्रिपुराची असल्याने भाषेची अडचण होत आहे.

नागपूर : नागपूर रेल्वे स्थानक परिसरात कोयंबटूरवरून आलेल्या 30 वर्षीय महिला प्रवाशावर बलात्काराची घटना समोर आली आहे. पीडित महिला ईशान्य भारतातील त्रिपुरा राज्याची रहिवासी असून गेले अनेक महिने नोकरीनिमित्त ती कोयंबटूर येथे राहत होती.

1 डिसेंबरला पहाटे पीडित महिला तिच्या मैत्रिणीसह नागपूर रेल्वे स्थानकावर उतरली. पुढे तिची मैत्रीण इंदूरच्या दिशेने निघाली. तर पीडित महिलेला त्रिपुराकडे जाणारी रेल्वे पकडायची होती. मात्र, तिची रेल्वे सुटल्यामुळे तिने रेल्वे स्थानकावर एका 40 ते 45 वयोगटातील पुरुषाला पोलीस स्टेशनचा पत्ता विचारला.

मात्र, त्या व्यक्तीने तिला पोलीस स्टेशनला नेण्याच्या बहाण्याने रेल्वे स्टेशन जवळच्या झुडपात नेले आणि तिच्यावर बलात्कार केला. घटनेनंतर आरोपी फरार झाला. पीडित महिलेला नागपूर रेल्वे स्टेशन परिसरात रडताना लोकांनी पाहिलं. त्यानंतर संपूर्ण प्रकार समोर आला.

गणेशपेठ पोलीस स्टेशनमध्ये याप्रकरणी बलात्काराचा गुन्हा दाखल करण्यात आला असून पोलीस आरोपीचा शोध घेत आहेत. दरम्यान, पीडित महिला त्रिपुराची असल्याने भाषेची अडचण होत आहे. तिला घटना घडलेलं ठिकाण आणि आरोपीबद्दल सांगताना अनेक अडचणी येत आहेत.