उल्हासनगरच्या तरुणाचं आईला अनोखं बर्थडे गिफ्ट, 50 व्या वाढदिवशी सरप्राईज हेलिकॉप्टर राईड

 लग्न झालं, दोन मुलं झाली, पण आईची 'ती' इच्छा कशी पूर्ण करावी? अखेर आईच्या 50 व्या वाढदिवसाला तिला सरप्राईज म्हणून हेलिकॉप्टरने फिरवण्याची कल्पना मुलाला सुचली.

Helicopter Ride

 उल्हासनगर : ज्या आईनं मुलांना अक्षरशः घरकामं करून वाढवलं, शिक्षण दिलं, मोठं केलं, त्या आईला तिच्या 50 व्या वाढदिवशी मुलानं सरप्राईज म्हणून चक्क हेलिकॉप्टरची राईड गिफ्ट केली. मुलाचं हे अनोखं गिफ्ट पाहून आईला आनंदाश्रू अनावर झाले. उल्हासनगरच्या प्रदीप गरड यानं त्याच्या आईला दिलेल्या या अनोख्या गिफ्टची शहरात मोठी चर्चा आहे.

रेखा दिलीप गरड या मूळच्या सोलापूर जिल्ह्यातील बार्शी तालुक्यातल्या.. लग्न होऊन उल्हासनगरात आल्या. मात्र मुलं लहान असतानाच अचानक पती दिलीप गरड यांचं निधन झालं. त्यावेळी मोठा मुलगा सातवीला मधली मुलगी पाचवीला, तर लहान मुलगा पहिलीत होता. यानंतर रेखा यांनी अतिशय कष्टाने तिन्ही मुलांना वाढवलं. मुलांना पालनपोषणासाठी रेखा यांनी अक्षरशः लोकांच्या घरची घरकामं केली. मोठा मुलगा प्रदीप याला त्यांनी आश्रमशाळेत शिकवलं. तिथे प्रदीप यानेही अतिशय जिद्दीने शिक्षण पूर्ण केलं आणि नोकरीला लागला. प्रदीप हा बारावीला असताना अचानक एक दिवस त्यांच्या घरावरून हेलिकॉप्टर गेलं. यावेळी आपल्याला कधी यात बसायला मिळेल? असं रेखा या सहज बोलून गेल्या. ती गोष्ट प्रदीपच्या मनात पक्की बसली. पुढे नोकरीत प्रगती करत प्रदीप हा आई आणि कुटुंबाला घेऊन चाळीतून स्वतःच्या फ्लॅटमध्ये आला.

 लग्न झालं, दोन मुलं झाली, पण आईची 'ती' इच्छा कशी पूर्ण करावी? अखेर आईच्या 50 व्या वाढदिवसाला तिला सरप्राईज म्हणून हेलिकॉप्टरने फिरवण्याची कल्पना प्रदीपला सुचली. त्यानुसार चौकशी करून त्यानं सगळी तयारी केली आणि आज सकाळी वाढदिवसानिमित्त सिद्धिविनायकाचं दर्शन घ्यायचं असल्याचं सांगत आईला थेट जुहू एअरबेसला नेलं. तिथं हेलिकॉप्टर पाहून आईला आनंदाश्रू आवरता आले नाहीत. आईसह प्रदीप, प्रदीपचं लहान भाऊ संदीप, प्रदीपची पत्नी, मुलं यांनीही हेलिकॉप्टर राईडचा आनंद घेतला. यानंतर या सगळ्यावर तुमची पहिली प्रतिक्रिया काय? असा प्रश्न विचारताच प्रदीप यांच्या आईला भावना आवरता आल्या नाहीत.

 या सगळ्यानंतर बोलताना प्रदीप याचाही कंठ दाटून आला होता. आईने आपल्याला खूप हालअपेष्टा सहन करून वाढवलं मोठं केलं, इतकंच नव्हे तर स्वतःच्या पायावर उभं केलं. त्यामुळं तिची अपूर्ण इच्छा पूर्ण करण्याची संधी मिळणं हेच माझ्यासाठी भाग्य असल्याचं प्रदीप कृतज्ञपणे सांगतो. या सगळ्यामुळे आईचा आनंद गगनात मावेनासा आल्यानंतर प्रदीपनंही आनंद व्यक्त केला. 

 ज्या आईनं आपल्याला बोट धरून चालायला शिकवलं, त्याच आईची इच्छा पूर्ण करत तिला घेऊन हेलिकॉप्टरनं आकाशाला गवसणी घालणारा प्रदीप गरड हा आजच्या युगातला श्रावणबाळच म्हणावा लागेल.. त्यामुळंच असा मुलगा सगळ्यांना मिळो, असं त्याची आई सुद्धा म्हणायला विसरत नाही.