एक्स्प्लोर

युतीच्या चर्चेला मुहूर्त, शिवसेना-भाजपची पहिली बैठक उद्या

Written By : एबीपी माझा वेब टीम | Updated at : 15 Jan 2017 09:17 AM (IST)

मुंबई : मुंबई महापालिकेत शिवसेना-भाजप युतीसंदर्भात चर्चेला अखेर मुहूर्त मिळाला आहे. शिवसेना-भाजपची पहिली बैठक उद्या म्हणजेच सोमवारी होणार आहे. सुत्रांनी यासंदर्भात माहिती दिली आहे. बैठकीला शिवसेनेतर्फे अनिल परब आणि अनिल देसाई उपस्थित राहणार आहेत, तर भाजपकडून आशिष शेलार आणि विनोद तावडे चर्चा करतील. या बैठकीतून कोणता निर्णय निघणार याकडे सर्वांचंच लक्ष लागून राहिलं आहे. शिवसेना आणि भाजपने युतीबाबत निर्णय घेण्यापूर्वी स्वतंत्रपणे सर्वेक्षण केलं आहे. शिवसेनेच्या सर्व्हेनुसार युती केल्यास पक्षाचं नुकसान होण्याची शक्यता आहे, तर स्वबळावर लढल्यास 30 ते 40 जास्त जागा मिळण्याची शक्यता समोर आली आहे. डिसेंबरच्या शेवटच्या आठवड्यात हा सर्व्हे करण्यात आला होता. भाजप स्वबळावर लढल्यास अधिक जागा मिळण्याचा अंदाज भाजपच्या सर्वेक्षणात होता. स्वबळावर लढल्यास शंभरच्या आसपास जागा मिळतील असा निष्कर्ष काढण्यात आला आहे. अगदी कमीतकमी म्हणजे 85 जागा तरी निश्चित मिळवता येतील, अशी खात्री भाजपच्या नेत्यांना वाटत आहे. त्यामुळे शिवसेनेशी जागावाटपात नमते घेऊन 100 पर्यंत जागा पदरात पाडून घेण्यापेक्षा सरळ लढत द्यावी, असा भाजपच्या नेत्यांचा कल आहे.