स्फोटक प्रकरणात अटक केलेले आमचे साधक नाहीत, 'सनातन'ने हात झटकले

ज्या ज्या प्रकरणात सनातनचं नाव गोवलं गेलं, त्या प्रकरणात आजपर्यंत कोणत्याही आरोपपत्रात सनातनचं नाव नाही, मग सनातन वर बंदीची मागणी का केली जातेय?, असा सवाल चेतन राजहंस यांनी उपस्थित केला.

मुंबई : नालासोपारा स्फोटक प्रकरणात वैभव राऊतसह नऊ जण पकडले गेले, ते सनातन संस्थेचे साधक नाहीत, असे सनातन संस्थेचे राष्ट्रीय प्रवक्ते चेतन राजहंस यांनी म्हटले. गेल्या काही दिवसांपासून सनातन संस्थेभोवती संशयाचं वातावरण निर्माण होत असल्याने, सनातन संस्थेचे राष्ट्रीय प्रवक्ते चेतन राजहंस आणि हिंदू जनजागृती समितीचे महाराष्ट्र संघटक सुनिल घनवट यांनी पत्रकार परिषद घेऊन सनातनची बाजू मांडली. "वैभव राऊतसह नऊ जण जे पकडले गेले, ते सनातनचे साधक नाहीत. एटीएसचं म्हणणं आहे की, तपास पूर्ण नाही, कोणत्याही संघटनेचं नाव घेऊ शकत नाही. गृहखातंदेखील कोणत्याही संघटनेचं नाव घेत नाही, तरी सनातनचं नाव घेऊन आरोपीच्या पिंजऱ्यात उभं केलं जातंय", असे चेतन राजहंस यांनी म्हटले. ज्या ज्या प्रकरणात सनातनचं नाव गोवलं गेलं, त्या प्रकरणात आजपर्यंत कोणत्याही आरोपपत्रात सनातनचं नाव नाही, मग सनातन वर बंदीची मागणी का केली जातेय?, असा सवाल चेतन राजहंस यांनी उपस्थित केला. "महाराष्ट्रातील एक समाजवादी पक्षाचे आमदार आहेत, त्यांच्या म्हणण्यानुसार बकरी ईदला स्फोट करण्याचा हेतू होता, तर कुणी म्हणतं की, सनातनकडे स्वत:ची सेना आहे, हे सर्व कशाच्या आधारावर बोललं जातंय? ज्यांनी ज्यांनी जातीय विधानं केली आहेत, खासकरुन ज्यांनी मराठा आंदोलनाबाबत सनातनचं नाव घेऊन जातीय विधानं केलीत, त्यांची चौकशी व्हावी." असा आरोप चेनत राजहंस यांनी केला. सोशल मीडियावरुन जे सनातन संस्थेचं नाव घेऊन अपप्रचार करत आहेत, जातीय वक्तव्य करत आहेत, त्यांची चौकशी व्हावी, हे महाराष्ट्र सरकारला आमचं आवाहन आहे, असे चेतन राजहंस म्हणाले. तसेच, मीडियातले काही लोक अपप्रचाराला बळी पडतात आणि खोट्या बातम्या पसरवल्या जात आहेत, असा आरोपही त्यांनी केला. पत्रकार परिषदेचा व्हिडीओ :