Raj Thackeray यांच्यावर उद्या शस्त्रक्रिया, चाचण्यांसाठी आज रुग्णालयात दाखल होणार : सूत्र

Raj Thackeray Surgery : मनसे अध्यक्ष राज ठाकरे यांच्यावर उद्या हिप बोनची शस्त्रक्रिया करण्यात येणार असून आज ते चाचण्यांसाठी लिलावती रुग्णालयात दाखल होती, अशी माहिती सूत्रांनी दिली आहे.

Raj Thackeray

Raj Thackeray Surgery : महाराष्ट्र नवनिर्माण सेनेचे अध्यक्ष राज ठाकरे यांच्यावर उद्या (19 जून) हिप बोनची शस्त्रक्रिया करण्यात येणार असल्याची माहिती सूत्रांनी दिली आहे. त्यासाठी राज ठाकरे आज मुंबईतील लिलावती रुग्णालयात दाखल होणार आहेत. राज ठाकरे यांच्या पायाचं दुखणं वाढल्यामुळे त्यांच्यावर ही शस्त्रक्रिया केली जाणार आहे. आज दुपारी ते लिलावती रुग्णालयात दाखल होऊन शस्त्रक्रिया करण्यापूर्वीच्या चाचण्या केल्या जातील. त्यानंतर त्यांच्यावर उद्या शस्त्रक्रिया केली जाईल, अशी माहिती सूत्रांनी दिली आहे. ही शस्त्रक्रिया झाल्यानंतर त्यांना साधारण दोन महिन्यांची सक्तीची विश्रांती घ्यावी लागणार आहे.

कोरोनाचे डेड सेल्स आढळल्याने शस्त्रक्रिया पुढे ढकलली
याआधी देखील राज ठाकरे शस्त्रक्रियेसाठी जून महिन्याच्या पहिल्या आठवड्यात रुग्णालयात दाखल झाले होते. पण तेव्हा त्यांच्या शरीरामध्ये कोरोनाचे डेड सेल्स आढळून आले होते. यामुळे त्यांना अॅनास्थेशिया म्हणजे भूलीचं इंजेक्शन देण्यात येऊ शकत नव्हतं. त्यामुळे त्यांच्यावरील शस्त्रक्रिया पुढे ढकलण्यात आली होती.

टेनिस खेळताना दुखापत
मध्यंतरीच्या काळात टेनिस खेळताना राज ठाकरे यांच्या पायाला दुखापत झाली होती. हीच दुखापत पुन्हा एकदा बळावली आहे. त्यामुळे डॉक्टरांनी हिप बोनची शस्त्रक्रिया करण्याचा सल्ला दिला. त्यानुसार उद्या लिलावती रुग्णालयात ही शस्त्रक्रिया पार पडेल.

अयोध्या दौरा स्थगित
राज ठाकरे मे महिन्यात पुणे दौऱ्यावर होते. हे दुखणं वाढल्यामुळे त्यांनी पुणे दौरा अर्धवट सोडून मुंबईत परतले. यानंतर राज ठाकरे यांनी आपला अयोध्या दौरा स्थगित केल्याचं जाहीर केलं. येत्या 5 जून रोजी राज ठाकरे मनसे पदाधिकारी आणि कार्यकर्त्यांसह अयोध्या दौऱ्याला जाणार होते. त्यासाठी जय्यत तयारीही करण्यात आली. परंतु पायाचं दुखणं अधिकच वाढल्याने डॉक्टरांनी शस्त्रकियेचा सल्ला दिला. परिणामी अयोध्या दौरा तूर्तास स्थगित करण्याचा निर्णय घ्यावा लागल्याचं राज ठाकरे यांनी सांगितलं होतं.

हिप बोन म्हणजे नेमकं काय?
हिप बोन म्हणजे कमरेच्या हाडांना होणारा त्रास. विशेष म्हणजे हा त्रास आपल्याला रोज जाणवत नाही तर, अचानक शरीराच्या एका विशिष्ट भागात तणाव जाणवतो. हिप बोनचा त्रास सांध्यांमध्ये जास्त जाणवतो. अधिकतर हा त्रास स्नायू आणि हाडांवर जास्त दबाव आल्यामुळे होतो. 

हिप बोनचा त्रास कशामुळे होतो? 
ठराविक वेळेनंतर अधिक तास काम करणे.
एकाच स्थितीत बराच वेळ राहणे. 
बदलती जीवनशैली हे एक प्रमुख कारण आहे.  
कॅल्शियमची कमतरता.