![metaverse](https://cdn.abplive.com/imagebank/metaverse-top.png)
BMC Khichdi Scam Case : महापालिका कथित खिचडी घोटाळा, ठाकरे गटाच्या अमोल किर्तीकरांची सहा तास चौकशी
Amol Kirtikar : अमोल किर्तीकर हे ठाकरे गटात असून ते शिवसेना शिंदे गटाचे खासदार गजानन किर्तीकरांचे सुपुत्र आहेत.
![BMC Khichdi Scam Case : महापालिका कथित खिचडी घोटाळा, ठाकरे गटाच्या अमोल किर्तीकरांची सहा तास चौकशी mumbai police eow interrogated amol kirtikar of shivsena uddhav thackeray in bmc khichadi sacm news BMC Khichdi Scam Case : महापालिका कथित खिचडी घोटाळा, ठाकरे गटाच्या अमोल किर्तीकरांची सहा तास चौकशी](https://feeds.abplive.com/onecms/images/uploaded-images/2023/09/20/f03558ce7771385a666b19252f214a9a169521563194493_original.jpeg?impolicy=abp_cdn&imwidth=1200&height=675)
मुंबई: ठाकरे गटाचे नेते अमोल किर्तीकर (Amol Kirtikar) यांची आज आर्थिक गुन्हे शाखेकडून (EOW) तब्बल सहा तास चौकशी करण्यात आली. महापालिकेशी (BMC) संबंधित कथित खिचडी घोटाळ्यामध्ये (Khichdi Scam Case) त्यांची चौकशी करण्यात आली आहे. अमोल किर्तीकर हे शिवसेना शिंदे गटाचे खासदार गजानन किर्तीकर यांचे पुत्र असून ते ठाकरे गटासोबत असल्यानेच त्यांच्यामागे चौकशीचा ससेमिरा लावण्यात आल्याची राजकीय चर्चा सुरू आहे.
खिचडी घोटाळा प्रकरणात (BMC Khichdi Scam Case) आर्थिक गुन्हे शाखेने अमोल किर्तीकर यांना समन्स देऊन आज चौकशीसाठी हजर राहण्यास सांगितलं होतं. याआधी याच प्रकरणात आदित्य ठाकरे यांचे निकटवर्तीय सुरज चव्हाण यांचीही चौकशी करण्यात आली आहे.
ठाकरे गटाच्या अडचणी वाढल्या
कथित बॉडी बॅग घोटाळा प्रकरणानंतर आता खिचडी घोटाळ्यातही आर्थिक गुन्हे शाखेने गुन्हा दाखल केला आहे. त्यामुळे पुन्हा एकदा ठाकरे गटाच्या अडचणी वाढल्याचं पाहायला मिळत आहे. गेल्या अनेक दिवसांपासून ठाकरेंच्या पदाधिकाऱ्यांच्या चौकशा सुरू आहेत. ठाकरे गटातून शिंदे गटात गेलेले खासदार गजानन किर्तीकर यांचे सुपुत्र अमोल किर्तीकरांची आज चौकशी करण्यात आली.
खिचडी घोटाळा नेमका आहे तरी काय?
मुंबई महानगरपालिकेचा कोरोना काळातील बॉडी बॅग घोटाळा चर्चेत असतानाच आता आणखी एका घोटाळ्या प्रकरणी कारवाई सुरू झाली आहे. मुंबई महानगरपालिकेचा 100 कोटींचा कोविड घोटाळा आता समोर आला आहे. गरिब मायग्रेन कामगारांसाठी, ज्यांचे स्वत:चे मुंबईत घर नाही त्यांना लॉकडाऊन काळात जेवणाची व्यवस्था करण्याचा निर्णय तत्कालीन सरकारनं घेतला होता. भारत सरकारचंही त्याला समर्थन होतं. या मायग्रेन कामगारांना खिचडी देण्याचं कॉन्ट्रॅक्ट 52 कंपन्यांना मुंबई महानगरपालिकेनं दिलं होतं. सुरुवातीच्या 4 महिन्यात 4 कोटी खिचडी पॅकेट वाटण्यात आले, असं मुंबई महानगरपालिकेचे म्हणणं आहे. पण यामध्ये घोटाळा झाल्याचा आरोप करण्यात आला आहे. त्याचीच चौकशी सुरू आहे.
खिचडी घोटाळा प्रकरणी गुन्हा दाखल
मुंबई महानगरपालिकेतील कथित खिचडी घोटाळा प्रकरणात मुंबई आर्थिक गुन्हे शाखेने गुन्हा दाखल केला आहे. कथित बॉडी बॅग प्रकरणानंतर आता खिचडी घोटाळ्यातही आर्थिक गुन्हे शाखेनं गुन्हा दाखल केला आहे. आर्थिक गुन्हे शाखेनं संजय राऊत यांचे निकटवर्तीय सुजीत पाटकर, सुनिल बाळा कदम, तत्कालीन सहआयुक्त, नियोजन, बीएमसी, सह्याद्री रिफ्रेशमेंटचे राजीव साळुंखे, फोर्सवन मल्टी सर्विसेसचे भागीदार आणि कर्मचारी, स्नेहा कॅटरर्सचे भागीदार, इतर बीएमसी अधिकारी आणि इतर संबंधितांविरोधात गुन्हा दाखल केला.
ही बातमी वाचा:
महत्त्वाच्या बातम्या
ट्रेंडिंग न्यूज
![metaverse](https://cdn.abplive.com/imagebank/metaverse-mid.png)
![सिद्धेश ताकवले](https://cdn.abplive.com/imagebank/editor.png)