Mumbai Corona Vaccination :  मुंबईत तीन दिवसांच्या ब्रेकनंतर आजपासून पुन्हा लसीकरण सुरु होणार

Mumbai Corona Vaccination : मुंबईत लसीकरणासाठी सध्या 1 लाख 35 हजार डोस उपलब्ध आहेत. यात कोविशिल्डचे 85 हजार डोस आणि कोवॅक्सिनचे 50 हजार डोस उपलब्ध आहेत.

BMC_Vaccine

Mumbai Corona Vaccination :  मुंबईत तीन दिवसांच्या ब्रेकनंतर आजपासून (12 जुलै) पुन्हा लसीकरण सुरु होणार आहे. गेल्या तीन दिवसांपासून मुंबईतील लसीकरण बंद होतं. सध्या मुंबईत 1 लाख 35 हजार लसीचे डोस उपलब्ध आहेत. मात्र, पुढील दोन दिवस हे डोस पुरतील. कारण दररोज कोविशील्ड लसीचे 40-50 हजार डोस दिले जातात. त्याच वेळी, कोवॅक्सिन लसीचे 15 हजार डोस दररोज दिले जातात. मंगळवारपर्यंत मुंबईतील लसीचा पुरवठा पूर्ववत होण्याची शक्यता आहे. सध्या कोविशिल्डचे 85 हजार डोस आणि कोवॅक्सिनचे 50 हजार डोस उपलब्ध आहेत.

मुंबईत गेल्या 24 तासात 558 कोरोनाबाधित रुग्णांची नोंद

मुंबईत गेल्या 24 तासात 558 कोरोनाबाधित रुग्णांची नोंद झाली आहे. तर 15 जणांचा कोरोनाने जीव गेला. मुंबईत आतापर्यंत 15 हजार 627 रुग्णांचे मृत्यू झाले आहेत. सध्या मुंबईत 11 हजार 423 सक्रिय रुग्ण उपचार घेत आहेत. 

राज्यातील कोरोनाची सद्यस्थिती

राज्यात मागील चोवीस तासांमध्ये 8 हजार 535 नवीन कोरोनाबाधितांची नोंद झाली आहे. तर आज 6 हजार 13 रुग्णांना उपचारानंतर घरी सोडण्यात आले. राज्यात आतापर्यंत 59,12,479 कोरोना बाधित रुग्ण बरे होऊन घरी गेले आहेत. त्यामुळे राज्यातील रुग्ण बरे होण्याचे प्रमाण 96.02 टक्के इतके झाले आहे.  शनिवारी नांदेड, भंडारा, गोंदिया आणि वर्धा जिल्ह्यांत एकही रुग्ण आढळलेला नाही. शनिवारच्या आकडेवारीनुसार सर्वाधिक 1146 कोरोनाबाधित रुग्ण कोल्हापुरात आढळले आहेत. 

देशभरातील लसीकरणाची माहिती

भारताच्या एकूण कोविड – 19 प्रतिबंधक लसीकरणाने 37.60 कोटींचा टप्पा ओलांडला आहे. रविवारी उपलब्ध झालेल्या अहवालानुसार, एकूण 48,33,797 सत्रांमधून 37,60,32,586 लसीचे डोस देण्यात आल्या. गेल्या 24 तासात 37,23,367 लसीच्या मात्रा देण्यात आल्या आहेत. राज्ये / केंद्रशासित प्रदेशांकडून आणि खासगी रुग्णालयांकडे अद्याप 1.44 कोटींपेक्षा अधिक (1,44,03,485) लसींचे डोस उपलब्ध आहे.

देशात गेल्या 24 तासात 41,506 नवीन रुग्णांची भर
केंद्रीय आरोग्य मंत्रालयानं जारी केलेल्या आकडेवारीनुसार, शनिवारी 41,506 नव्या कोरोना बाधितांची नोंद करण्यात आली असून 895 कोरोना रुग्णांचा मृत्यू झाला आहे. त्यापूर्वी शुक्रवारी देशात 42,766 नव्या कोरोना बाधितांची नोंद करण्यात आली होती. शनिवारी देशात 41,526 रुग्ण कोरोनामुक्त झाले आहेत.